झापाको गौरादहमा मंसिर ८ गते आइतवारदेखि १६  गतेसम्म हुने आध्यात्मिक तथा सांस्कृतिक पर्यटन महोत्सव–२०७६ को पूर्वसन्ध्यामा बृहत् नगर सरसफाइ गरिएको छ  ।

शनिवार बिहान ७ बजेदेखि गौरादह नगरमा सरसफाइ गरिएको हो । 

गौरादहका स्थानीय संघसंस्थाको सहभागितामा भएको बृहत् नगर सरसफाइ कार्यक्रममा लायन्स क्लब, जेसिज, उद्योग वाणिज्य संघ, पतञ्जली योग समिति लगायत संस्था र मूल समारोहका सबै समितिभित्र रहेका संस्थाको संलग्नता थियो । 

देशका प्रसिद्ध मठमन्दिरको दर्शन एकैठाउँमा गर्न सकिने व्यवस्था मिलाइएको आध्यात्मिक तथा सांस्कृतिक पर्यटन महोत्सवमा सर्वसाधारणको आकर्षण देखिएको छ । महोत्सवमा ताप्लेजुङको पाथिभरा देवी, सानो लुम्बिनीको जोन, मुक्तिनाथको प्रतिक स्वरुप १०८ धारा, पशुपतिमा गरिँदै आएको महाआरती दर्शन गर्न नपाइने छ ।

महोत्सव अवधिभर हरेक दिन विभिन्न जातजातिका विभिन्न सांस्कृतिक मौलिक कला प्रस्तुति साँझ साढे ६ देखि साढे ७ बजेसम्म प्रस्तुति गर्ने तयारी छ ।

नेपाल मानव धर्म सेवा समिति गौरादहको संयोजकत्वमा आयोजित कार्यक्रमलाई ऐतिहासिक तथा भव्य बनाइने महोत्सवकी संरक्षक महात्मा गौमुखी बाइजीले बताइन् ।

महोत्सवको तयारी अन्तिम चरणमा पुगेको महोत्सव मूल समारोह समितिका अध्यक्ष डा. तिलक खनालले बताए । ‘नकारात्मक ऊर्जालाई सकारात्मक ऊर्जाले भर्ने हाम्रो अभियान हो र यसलाई सफल पारौं । सुसंस्कृत समाज बनाउने अभियानका रुपमा यसलाई अगाडि बढाइरहेका छौं,’ उनले भने ।