नेपाल कम्युनिष्ट पार्टी (नेकपा) का महासचिव विष्णु पौडेलले आशन्न नेपाल भ्रमण वर्ष २०२० नेपाल सरकारको मात्रै जिम्मेवारी नभई साझा राष्ट्रिय कार्यक्रम भएको बताएका छन । नेकपाको सम्पूर्ण पार्टी पङ्क्तिले भ्रमण वर्षका लागि आउने दायित्व पूरा गर्ने उनले प्रतिबद्धता जनाए । 

भ्रमण वर्षलाई केन्द्रित गरेर बिहीवार पर्यटन मन्त्रालयले आयोजना गरेको कार्यक्रममा महासचिव पौडेलले भ्रमण वर्ष सफल बनाउन भातृसंगठन र कार्यकर्ता परिचालन गर्न तयार रहेको बताएका हुन । 

‘यो एकचोटि पर्यटक आएर फर्कने कुरा होइन, उनीहरुले यस्तो सन्देश लिएर जाउन की, आफ्नो देशमा पुगेर पटकपटक गइरहनुपर्ने ठाउँ नेपाल हो भन्न सकुन’ पूर्वअर्थमन्त्री समेत रहेका महासचिव पौडेलले भने, ‘अतिथिलाई देवता मान्ने संस्कार नेपालमा छ ।’

त्यही आचरण र व्यवहार प्रदर्शन गर्नका लागि त्यसको स्रोत व्यक्तिका रूपमा दलका नेता तथा कार्यकर्ताहरुले भूमिका निर्वाह गर्नुपर्ने भन्दै पौडेलले यसतर्फ सबैको साझा प्रयास हुनुपर्नेमा जोड दिए । 

गौतमबुद्धको जन्मस्थल लुम्बिनी, विश्वको अग्लो शिखर सगरमाथा अन्य कुनै देशले बनाउँछु भनेर बनाउन नसक्ने उल्लेख गर्दै बरु त्यस्ता सम्पदा र सम्भावनाको विश्वमा प्रचार जरुरी रहेको पौडेलको  भनाइ थियो ।

नेकपा र भ्रातृसङ्गठनका प्रतिनिधिहरुलाई अवैतनिक स्वयंसेवकको रूपमा परिचालन गर्न नेकपा तयार रहेको पौडेलले प्रतिबद्धता जनाए । 

कार्यक्रममा नेपाली कांग्रेसका नेता तथा पूर्वमन्त्री मोहनबहादुर बस्नेतले भ्रमण वर्ष नेपालीहरुको साझा कार्यक्रम र साझा स्वार्थ भएको उल्लेख गरे । 

काठमाडौँ र प्रदेशस्तरमा आगामी जनवरी १ मा र विदेशमा जनवरी ७ तारिखमा भ्रमण वर्षको औपचारिक उद्घाटनको तयारीमा जुटेको सरकारले राजनीतिक दल र तिनका भ्रातृसङ्गठन, नेपालस्थित विदेशी राजदूतावास र कूटनीतिक नियोगदेखि विभिन्न सङ्संस्था प्रतिनिधिहरुको रायसुझाव र प्रतिबद्धता लिइरहेको छ । 

सन २०२० मा कम्तीमा २० लाख पर्यटक भित्र्याउने लक्ष्य सरकारको छ ।