गोकर्णेश्वर नगरपालिकाले जोरपाटी–गोकर्ण–सुन्दरीजल सडक विस्तारका लागि संरचना खाली गर्न शुरूआत गरेको छ ।  

सार्वजनिक जग्गा भएको स्थानमा केन्द्रविन्दुबाट दायाँबायाँ ११/११ मिटर र  निजी जग्गा भएको ठाउँमा केन्द्रविन्दुबाट दायाँबायाँ ७/७ मिटर लिने गरी शुक्रवारदेखि काम शुरू भएको नगरपालिकाका प्रवक्ता मनोजकुमार ढुंगानाले बताए ।

‘स्थानीयको सहमति लिएर नै सडक विस्तार शुरू गरेका हौं । नगरपालिकाले आफ्नै स्वामित्वमा रहेको भैरव स्मृति जोरपाटी बगैंचाबाट विस्तारको काम शुरू भएको छ, यसपछि सानोबजार क्षेत्र हुँदै अघि बढ्छौं,’ उनले भने ।

संरचना हटाउन तीनै तहका निर्वाचित जनप्रतिनिधि सडकमा ओर्लिएका थिए । काठमाडौं क्षेत्र नम्बर ३ का सांसद कृष्णकुमार राई, प्रदेशसभा सदस्य रामेश्वर फुयाँल, गोकर्णेश्वर नगरपालिकाका प्रमुख सन्तोष चालिसे, उपप्रमुख शान्ति नेपाललगायत जनप्रतिनिधि संरचना भत्काउने कार्यमा सहभागिता जनाएका थिए ।

सो सडकखण्ड विक्रम संवत् २०७५ भदौमा कालोपत्र भइसक्नुपर्ने गरी विस्तारका गर्न ४ वर्षअघि ठेक्का भएको थियो । पहिलोपटक थपिएको म्याद गत भदौमा सकिएको थियो ।

यसपछि आगामी असार मसान्तसम्म काम सक्ने गरी दोस्रोपटक म्याद थपिएको काठमाडौं उपत्यका सडक विस्तार आयोजनाले जनाएको छ ।  

सडक विस्तार हुन नसकेपछि ५ पटकसम्म सडक मर्मत कार्य भइसकेको आयोजनाले जनाएको छ । सडकमा नाली खोल्न नदिएपछि जति पटक मर्मत गरेपनि दीगो हुन नसकेको आयोजना प्रमुख अर्जुन अर्यालले बताए ।

करीब ७ किमी सडक ५४ करोड रुपैयाँको लागतमा विस्तार गरी कालोपत्र गर्न ठेक्का सम्झौता भएको हो । २ खण्डमा ठेक्का सम्झौता भएकामा दुवैतिरका काम अलपत्र छ । सडक नबन्दा घाम लागेका बेला धुलो र पानी परेका बेला हिलोले किनारा क्षेत्रमा बस्न नसकिने स्थानीय रामचन्द्र खतिवडाको गुनासो छ । 

यही बाटो भएर पर्यटकीयस्थल सुन्दरीजल हुँदै चिसापानी, हेलम्बु, लाङटाङलगायत स्थानमा पुग्न सकिन्छ । हेलम्बु, लाङटाङलगायत स्थानमा पदयात्रा समेत गर्न सकिने यो सडक ४ वर्षदेखि अलपत्र हुँदा पर्यटकमा नकारात्मक सन्देश गएको पर्यटन व्यवसायीको दुःखेसो छ । 

स्थानीयले नेपाल भ्रमण वर्ष सन् २०२० अगावै सडक कालोपत्र गर्न विगत १ वर्षदेखि माग गर्दै आएका थिए । भ्रमण वर्ष शुरू हुन १ महिना पनि बाँकी नहुँदा बल्ल काम शुरू भएको छ ।