भारतसँगको सीमा विवादबारे छलफल गर्न नेपाल सरकारले परराष्ट्र सचिवस्तरीय वार्ताको पहल थालेको छ । सत्तारुढ नेपाल कम्युनिस्ट पार्टी (नेकपा)ले पार्टीका वरिष्ठ नेता माधवकुमार नेपाललाई ‘विशेष दूत’का रूपमा भारत पठाउने चर्चा चलिरहेका वेला सचिवस्तरीय वार्ताको पहल अघि बढाइएको हो ।

प्रधानमन्त्री केपी ओलीले पूर्वप्रधानमन्त्रीसमेत रहेका नेपाललाई ‘विशेष दूत’का रूपमा भारत जान आग्रह गरेपछि उनले १६ मंसिरमा पूर्वराजदूतसहित विज्ञसँग सुझाब मागेका थिए । १८ मंसिरमा नेकपा सचिवालय बैठकमा उनले प्रधानमन्त्री ओलीको चाहनाबारे ‘ब्रिफिङ’ गरे । नेता नेपालले भारतले सीमा विवादबारे कुराकानी गर्न नचाहेको बताएका थिए । सरकारले नेता नेपाललाई अहिलेसम्म औपचारिक रूपमा ‘विशेष दूत’ नियुक्त गरेको छैन ।

‘हामीले भारतसँग विदेश सचिवस्तरीय संयन्त्रको बैठकका लागि आग्रह गर्दै नोट पठाएका छौँ । योबाहेक परराष्ट्र मन्त्रालयले भारतलाई चिठी पठाएको छैन,’ परराष्ट्र सचिव शंकरदास वैरागीले नयाँ पत्रिकासँग भने । विशेष दूतसम्बन्धी विषयबारे मन्त्रालय जानकार नभएको उनको भनाइ थियो । ‘यस सम्बन्धमा राजनीतिक तहमा छलफल भएको हुन सक्छ, हामीलाई जानकारी छैन । हामी सचिवस्तरीय बैठकका लागि प्रयासरत छौँ,’ उनले भने ।

नेकपा प्रवक्ता नारायणकाजी श्रेष्ठले विशेष दूत पठाउने विषयमा आवश्यकताभन्दा बढी चर्चा भएको जिकिर गरे । सोमबार सचिवालय बैठकपछि सञ्चारकर्मीसँग उनले भने, ‘प्रधानमन्त्रीज्यूले भारत गइदिन प्रस्ताव गरेको विषय उहाँले अघिल्लो सचिवालय बैठकमा राख्नुभएको हो ।’ नेकपा विदेश विभाग प्रमुखसमेत रहेका नेपालले १६ मंसिरमा नयाँ बानेश्वरको होटेल अर्यालमा विज्ञसँग सुझाब माग्न आयोजना गरेको बैठकमा श्रेष्ठ पनि सहभागी थिए ।