सञ्चार तथा सूचना प्रविधिमन्त्री तथा सरकारका प्रवक्ता गोकुल बास्कोटाले खेलाडीहरूले पैसाका लागि नखेलेको भन्दै पुरस्कारका सन्दर्भमा असन्तुष्ट नहुन आग्रह गरेका छन् । 

मन्त्रिपरिषद् बैठकका निर्णय सार्वजनिक गर्न मन्त्रालयमा आयोजित पत्रकार सम्मेलनमा बोल्दै बास्कोटाले खेलाडीलाई प्रोत्साहन गर्ने धेरै विधि भएको भन्दै असन्तुष्ट नहुन आग्रह गरेका हुन् ।

सामूहिक खेलमा रजत पदक प्राप्त गर्ने खेलाडीका लागि पुरस्कार घोषणा नभएको असन्तुष्टि आएको भन्दै बास्कोटालाई पत्रकारले प्रश्न सोधेका थिए ।

‘उहाँहरू पैसाको लागि खेल्नुभएको थिएन,’ बास्कोटाले भने, ‘देशका लागि खेल्नुभएको थियो । मेहनत उहाँहरूको हो तर समर्पण देशका लागि गर्नुभएको छ । सम्माननीय प्रधानमन्त्री आफैंले अढाइ घण्टा गेम हेर्नुभयो । त्यो प्रोत्साहन थियो । समापनको दिन पनि प्राविधिक कारणले उहाँको भ्वाइस आएन तर पनि प्रोत्साहन नै भयो ।’ 

बास्कोटाले यत्रो ठूलो इभेन्ट सफलतापूर्वक रूपमा सम्पन्न भएको भएपनि सानोतिनो गल्तीमा खेल्ने प्रवृत्ति बढेको आरोप लगाए । ‘यत्रो इभेन्ट हुँदा सानोतिनो गल्ती भयो भने त्यसमा खेल्ने होइन, सल्लाह सुझाव दिने भए राम्रो हुन्थ्यो । उपलब्धीलाई ओझेलमा पार्ने र कमजोरीमाथि खेल्ने प्रवृत्ति छ, जुन गलत हो,’ उनले भने ।

उनले सबै खेलाडीलाई प्रोत्साहन गर्ने विषयमा छलफल गर्ने बताए । ‘हिजो प्रधानमन्त्रीले अर्को कुरा पनि बताउनुभएको छ, हामीले छलफल गर्दै प्रोत्साहित नै गर्छौं भन्नुभएको छ,’ उनले भने, ‘उहाँ आफैंले केही छुटेका छन्, हाम्रो ध्यान पुगेको छैनन् भने हामी सम्बोधन गर्छौं भन्नुभएको छ । यथोचित सम्बोधन सबै खेलाडीका हकमा हुन्छ ।’

प्रवक्ता बास्कोटाले प्रधानमन्त्रीले गरेको घोषणा नै अन्तिम भएको बताए । ‘प्रधानमन्त्रीले घोषणा गरेको कुरामा मन्त्रीहरूको के टाउको दुखाइ ?’ बास्कोटाले प्रश्न गरे, ‘प्रधानमन्त्रीले घोषणा गरिसक्नुभयो । खेलकुद मन्त्रीले दुखेसो गर्नुभएको छैन । उहाँकै घोषणाअनुसार हुन्छ ।’

प्रवक्ता बास्कोटाले प्रधानमन्त्री ओली अस्पतालमा हुँदा पनि निकै रुचिपूर्वक साग हेरेको बताए । ‘प्रधानमन्त्रीले अस्पतालमै पनि ठट्टा गर्नुभएको थियो,’ उनले भने, ‘मलाई किन थुनेको ? मलाई त्यहाँ गएर गोल गरौं गरौं भयो भन्नुभएको थियो । त्यो पनि एक किसिमको प्रोत्साहन नै हो ।’