लागूऔषधको प्रयोग रोकथाम र नियन्त्रणका लागि बुटवल उपमहानगरपालिकामा निःशुल्क कानुनी तथा मनोसामाजिक परामर्श केन्द्र सञ्चालनमा ल्याइएको छ ।

बुटवल उपमहानगरपालिकाको वडा नम्बर ५ कार्यालय नजिकै सञ्चालनमा ल्याइएको उक्त परामर्श केन्द्रको बिहीवार प्रहरी महानिरीक्षक सर्वेन्द्र खनाल र बुटवल उपमहानगरपालिका प्रमुख शिवराज सुवेदीले संयुक्त रुपमा उद्घाटन गरेका हुन् ।

उद्घाट्नपछि समारोहलाई सम्बोधन गर्दै प्रहरी महानिरीक्षक (आईजीपी) सर्वेन्द्र खनालले लागूऔषध प्रयोगकर्तालाई दण्ड होइन, परामर्श दिने उद्देश्यले बुटवल उपमहानगरको सहकार्यमा परामर्श केन्द्र सञ्चालनमा ल्याइएको बताए ।

बुटवलमा सञ्चालित केन्द्रबाट लागूऔषधको नियन्त्रण हुने विश्वास व्यक्त गर्दै प्रहरी प्रमुख खनालले लागूऔषध विकराल सामाजिक समस्या बन्दै गएकाले प्रहरीले स्थानीय सरकारसँग मिलेर परामर्श केन्द्र स्थापना गर्ने अभियान नै शुरू गरेको बताए ।

महानिरीक्षक खनालले भारतसँगको खुला सिमाको कारण लागूऔषधको प्रयोग तथा ओसारपसारका अपराधहरू हुने गरेको उल्लेख गर्दै समुदायको सहयोगले मात्र लागूऔषध, अपराध नियन्त्रण तथा शान्ति सुरक्षा कायम गर्न सम्भव हुने बताए ।

कुनै पनि पहुँच वा ओहादाको भएपनि अपराधीलाई उन्मुक्ति नदिइने र लहलहैमा कुलतमा फसेकालाई परामर्शमार्फत पुनस्थापना गर्न केन्द्रको स्थापना गरिएको उनको भनाइ थियो । 

कार्यक्रममा बुटवल उपमहानगरपालिकाका प्रमुख शिवराज सुवेदीले युवा पुस्तामा लागूपदार्थ सेवनको कुलत हट्न नसकेकोमा चिन्ता व्यक्त गर्दै कारोबार तथा ओसारपसार नियन्त्रणका लागि प्रहरी र समुदायबीच सामूहिक प्रयास जरुरी रहेको धारणा व्यक्त गरे ।

लागूऔषध प्रयोगको रोकथाम र नियन्त्रणका लागि बुटवलमा स्थापित कानुनी तथा मनोसामाजिक निःशुल्क परामर्श केन्द्रलाई सेवा केन्द्रका रुपमा विकास गरिने उल्लेख गर्दै लागूऔषधको प्रयोग र कारोबारमा संलग्नलाई निरुत्साहित गर्न सहकार्य गरिने प्रमुख सुवेदीको भनाइ थियो । 

लागूऔषध प्रयोगकर्ताको पुनःस्थापनाका लागि खुलेका निजी केन्द्रहरूमा चर्को शुल्क दिने गरेको र राम्रोसँग उपचार नहुने गरेका गुनासाहरू आइरहेको बताउँदै प्रमुख सुवेदीले बुटवलमा शुरू भएको निःशुल्क कानुनी तथा मनोसामाजिक परामर्श केन्द्रले धेरै लाभान्वित हुने दाबी गरे ।

कार्यक्रममा परामर्श केन्द्र सञ्चालनको लागि बुटवल उपमहानगरपालिकाका प्रशासकीय अधिकृत चक्रपाणि शर्मा र जिल्ला प्रहरी कार्यालय रुपन्देहीका प्रहरी प्रमुख प्रहरी उपरीक्षक हेमबहादुर थापाले सम्झौता पत्रमा हस्ताक्षर गरेका थिए । 

बुटवलको वडा नम्बर ५ को कार्यालय परिसरमा यो परामर्श केन्द्र स्थापना गरिएको छ । यहाँ दक्ष परामर्शदाताले नियमित सेवा प्रदान गर्नेछन् । अपराध विरुद्धको समुदायको सहकार्यका लागि पनि यसखालको परामर्श केन्द्र उपयोगी हुने बताइएको छ । 

कार्यक्रममा प्रदेश सभाका सदस्य सन्तोष पाण्डे रुपन्देहीका प्रमुख जिल्ला अधिकारी महादेव पन्थ, नेपाल पत्रकार महासंघ रुपन्देहीका उपाध्यक्ष दिनेश पाण्डे, प्रहरी कार्यालयका वसन्त थापा, महिला अगुवा रीतासेन ओलीलगायतले शान्ति सुरक्षा कायम राख्ने काममा प्रहरी र नागरिकको भूमिका महत्त्वपूर्ण हुने विचार व्यक्त गरेका थिए ।