अमेरिकाले अल–कायदा इन दी अरेबियन पेनिन्सुलाका नेता कासिम अल–रिमीको हत्या गरेको पुष्टि राष्ट्रपति डोनल्ड ट्रम्पले गरेका छन् । उक्त समूहले अमेरिकाको एक जलसैन्य अड्डामा सामूहिक आक्रमण गरेको जिम्मेवारी लिएको थियो । 

बिहीवार एक बयान जारी गरेर ट्रम्पले आफ्नो निर्देशनमा यमनमा अमेरिकाले प्रतिआतंकवादी कारवाही गरेर अल–रिमीको हत्या गरेको बताए । 

अल–रिमी अल–कायदा इन दी अरेबियन पेनिन्सुलाका संस्थापक हुन् । 

यस समूहलाई अल–कायदाको सबभन्दा खतरनाक शाखा मानिन्छ र यसले अमेरिकाको मुख्यभूमिमा आक्रमणका कैयौं प्रयास गरेको छ । 

यस जिहादी समूहले गत डिसेम्बर महिनामा नेभल एयर स्टेसन पेन्साकोलामा खतरनाक आक्रमण गरेको थियो । त्यसक्रममा एक साउदी प्रशिक्षार्थीले तीन अमेरिकी नाविकहरूको हत्या गरेका थिए । 

ट्रम्पले अल–रिमीको हत्याको पुष्टि गरे पनि अमेरिकी कारवाही कहिले गरिएको बताएनन् र कसरी गरिएको भन्ने विषयमा विस्तृत विवरण पनि दिएनन् । 

अल–रिमीको मृत्युपछि अमेरिका र उसका साझेदारहरू थप सुरक्षित भएको चाहिँ उनले बताए । 

अल–रिमीलाई पक्राउ गर्नका लागि अमेरिकाको परराष्ट्र मन्त्रालयले एक करोड डलर पुरस्कार घोषणा गरेको थियो ।