इजरायलले प्यालेस्टाइनको कृषि निर्यातमा प्रतिबन्ध लगाएको छ।

प्यालेस्टाइनको अर्थव्यवस्था मन्त्रालयका  प्रवक्ता अज्मी अब्देल रहमानले जोर्डन हुँदै सबै प्यालेस्टाइनको कृषि निर्यातमा प्रतिबन्ध लगाउने निर्णय फेब्रुअरी ६ देखि लागू गरिसकेको जानकारी गराएका हुन्। 

‘इजरायली निर्णय जोर्डनतर्फको एलेन्बी सीमा पार गरेर हाम्रा किसानहरूको बिरूद्धमा लागू भइसकेको थियो, तर हामीलाई आज प्रतिबन्धका बारे आधिकारिक रूपमा सूचित गरिएको छ,’ उनले भनेका छन्।

इजरायलले निर्यातमा प्रतिबन्ध लगाएका प्यालेसस्टनी सामानहरूमा जैतुनको तेल र जडिबुटी रहेका छन्। जस अन्तर्गत वार्षिक १० करोड अमेरिकी डलर मूल्य बराबरको कृषि उपजलाई इजरायल प्रवेशमा रोक लागेको रहमानले बताए।

यसपहिले प्यालेस्टिनी सरकारले तरकारी, फलफूल, खनिज पानी र शीतल पेयजस्ता इजरायली उत्पादनहरू आयात गर्नमा प्रतिबन्ध लगाएको घोषणा गरेको थियो। गत सेप्टेम्बरमा प्यालेस्टाइन सरकारले मासुका लागि आयात गरिने इजरायली बाच्छाहरूलाई प्रतिबन्ध लगाउने निर्णय गर्दै विवादको सुरूवात भएको थियो । बदलामा प्यालेस्टिनी सरकारले इजरायली ताजा तरकारी र फलफूलमा प्रतिबन्ध लगाइएको थियो।

‘इजरायलले पेरिस प्रोटोकलको लगभग सबै धाराको उल्लङ्घन गरिसकेको छ,’ अब्देल रहमानले भनेका छन्। ‘प्यालेस्टाइन र जोर्डनबीचको निर्यातमा इजरायललाई हस्तक्षेप गर्न दिइनु हुँदैन,’ उनले अगाडि भनेका छन्।

पेरिस प्रोटोकल सन् १९९४ मा इजरायल र प्यालेस्टाइन मुक्ति संगठनबीचको आर्थिक सम्बन्धलाई नियन्त्रण गर्नका लागि हस्ताक्षर गरिएको आर्थिक सन्धि हो। जसमा प्यालेस्टाइनहरुलाई इजरायलले बन्दरगाह र सीमा नाका स्वतन्त्र रूपमा उपयोग गर्न मिल्ने र दुबै पक्षले नियमित बैठकहरुमा सहभागिता जनाउने उल्लेख गरिएको छ।

यद्यपि दुई पक्षबीचको संयुक्त आर्थिक समितिले सन् २००० मा बैठक गर्न बन्द ग¥यो । तर इजरायलले त्यसपछि एकपक्षीयरूपमा आफु अनुकुलका घोषणा गर्दै आएको अब्देल रहमानले बताए।