शहीद स्मारक 'ए' डिभिजन लीग फूटबलमा सशस्त्र प्रहरी बल (एपीएफ) क्लबले फ्रेन्ड्स क्लबमाथि सानदार जीत हात पारेको छ । 

सातदोबाटोस्थित एन्फा कम्प्लेक्सको खेल मैदानमा सोमवार भएको पहिलो खेलमा एपीएफले फ्रेन्ड्स क्लबलाई ५–२ गोल अन्तरले पराजित गरेको हो । एपीएफको जीतमा आशिष लामा र प्रवीन स्याङतेनले दुई/दुई गोल गरे भने कप्तान टोपबहादुर विष्टले थप एक गोल गरे । पराजित फ्रेन्ड्स क्लबका लागि विश्व अधिकारी र फिलिपे डी सौजाले एक एक गोल गरे ।

खेलको १२ औं मिनेटमा आशिषले गोल गर्दै एपीएफलाई शुरूआती अग्रता दिलाए । खेलको ४० औं मिनेटमा आशिषले व्यक्तिगत दोस्रो गोल गर्दै एपीएफलाई २–० को अग्रता दिलाए । खेलको ६९ औं मिनेटमा फिलिपेले गोल गर्दै फ्रेन्ड्सलाई २–१ को स्थितिमा ल्याए । खेलको ७१ औं मिनेटमा प्रवीनले गोल गर्दै एपीएफलाई ३–१ को अग्रता दिलाए । ७६ औं मिनेटमा फ्रेन्ड्सका विश्वले गोल गर्दा खेल ३–२ को स्थितिमा पुग्यो । 

त्यसपछि खेलको दोस्रो हाफको अतिरिक्त समयमा एपीएफले लगातार दुई गोल गर्‍यो । जसमा कप्तान टोपबहादुरले गोल गर्दै एपीएफलाई ४–२ को अग्रता दिलाए भने प्रवीनले व्यक्तिगत दोस्रो गोल गर्दै एपीएफलाई ५–२ को सानदार जीत दिलाए । 

जारी लिगमा यो एपीएफको दोस्रो जीत हो । जीतसँगै एपीएफले १२ खेलमा आठ अंक जोडेको छ । एपीएफ १३ औं स्थानमा छ । पराजित फ्रेन्ड्स १२ खेलमा १४ अङ्क जोडेर लिगको नवौँ स्थानमा रहेको छ । खेलमा एपिएफका आशिष लामा म्यान अफ दि म्याच घोषित भए ।