अमेरिकाविरुद्ध नेपालले शानदार जीत हासिल गरेपछि कलाकार मधुसुधन पाठक 'सीते बा'ले रंगशाला निर्माणका लागि सहयोगको घोषणा गरेका छन् । 

सक्किगोनी हाँस्यटेलिसिरियलका कलाकार पाठकले नेपालको जीतको खुशियालीमा चितवनमा निर्माणाधीन गौतमबुद्ध अन्तर्राष्ट्रिय रंगशालाका लागि ५ हजार रुपैयाँ सहयोग गर्ने घोषणा गरेका छन् ।

उनले सामाजिक सञ्जाल फेसबूकमार्फत उक्त सहयोग रकमको घोषणा गरेका हुन् । उनले लेखेका छन्, 'आजको खेलमा 'हाम्रो शान हाम्रो नेपाली क्रिकेट टीम'ले अमेरिकालाई ३५ रन मै अलआउट गरेर विश्व कीर्तिमान राख्न सफल भएको खुशियालीमा रु. ५००० गौतम बुद्ध अन्तर्राष्ट्रिय क्रिकेट स्टेडियमलाई सहयोग गर्ने घोषणा गर्दछु । यो ऐतिहासिक जीतको लागि नेपाली टीमलाई बधाई ।' 

बुधवार त्रिवि क्रिकेट मैदान, कीर्तिपुरमा भएको खेलमा नेपालले अमेरिकालाई ८ विकेटले पराजित गरेको हो । 

नेपालले विपक्षी टीमलाई सबैभन्दा सानो स्कोरमा समेट्ने विश्व कीर्तिमानसँग बराबरी गरेको छ । 

नेपालले अमेरिकालाई १२ ओभरमा अमेरिकालाई ३५ रनमै अलआउट गरेको थियो । यो एक दिवसीय क्रिकेटमा सबैभन्दा कम रनमा समेटिएको अवस्था हो । 

यसअघि सन् २००४ मा श्रीलंकाले जिम्बाबेलाई पनि ३५ रनमै समेटेको थियो ।