जनप्रतिनिधि र कर्मचारी भ्रमणमा हिँडेपछि नगरपालिकाको सेवा प्रवाहमा समस्या

प्रतिकात्मक तस्वीर

भोजपुर नगरपालिकाका जनप्रतिनिधि तथा कर्मचारी भ्रमणमा हिँडेपछि सेवा प्रवाहमा समस्या भएको छ ।

नगर प्रमुख कैलाशकुमार आले, उपप्रमुख ममिता राई, प्रमुख प्रशासकीय अधिकृत रामप्रसाद ढुंगेल, लेखा प्रमुख सुरेन्द्रकुमार श्रेष्ठ, ४ जना वडाध्यक्ष, प्राविधिक, कम्प्युटर अपरेटर गरी १७ जनाको टोली भ्रमण हिँडेपछि दैनिक कामकाजमा समस्या भएको हो । 


Advertisement

वडा नम्बर ६ का वडाध्यक्ष शैलेन्द्र कार्कीले नगर कार्यपालिकाको बैठकमा भ्रमणका विषयमा कुनै पनि निर्णय नभएकाले आफूलाई कुनै पनि जानकारी नभएको बताए । वडाध्यक्ष कार्कीले भने, ‘मेयर, उपमेयर, प्रमुख प्रशाकिय अधिकृत, लेखा अधिकृत ४ जना वडाध्यक्ष प्राविधिकलगायत १७ जना भ्रमणमा हुनुहुन्छ तर भ्रमणको विषयमा कार्यपालिका बैठकबाट निर्णय भएको मलाई जानकारी छैन, उहाँहरू नहुँदा सेवा प्रवाहमा समस्या त धेरै नै छ ।’

गत आइतवारदेखि भ्रमणमा गएको भएपनि कहिले फर्कने भन्ने थाहा नभएको कार्यालयका एक कर्मचारीले बताए । कार्यालयमा सेवा लिनका लागि आएका आङपासाङ शेर्पाले भने, ‘जनप्रतिनिधि तथा कर्मचारी काम नै ठप्प पारेर जानु भनेको लापरवाही हो, भ्रमणमा गएको विषयमा अन्य कर्मचारीलाई समेत थाहा छैन, यस्तो पनि हुन्छ ?’


Advertisement

कार्यालयका अधिकांश शाखा कर्मचारीविहीन छन् । कार्यालयमा सम्झौताको काम भइरहेको भएपनि आर्थिक कारोबार भने ठप्प रहेको छ ।    इन्जिनीयर अरुण हमालले भने, ‘मलाई काम गर्दै गर्नु भनेर मौखिक रुपमा भनेकाले काम गरिरहेको छु तर  लिखित रुपमा प्रमुख प्रशासकीय अधिकृतले जानकारी दिनुभएको छैन ।’

नगर प्रमुख, प्रशाकीय अधिकृत तथा अन्य जिम्मेवार कर्मचारीबाहिर गएको विषयमा सामाजिक सञ्जालबाट थाहा पाएको कर्मचारीले बताएका छन् । साथै उनीहरूले कति दिने भ्रमण हो भन्ने समेत थाहा नभएको बताए । कार्यालयका कर्मचारी शुक्रबहादुर राईले भने, ‘कति दिने भ्रमण हो त्यो थाहा छैन, भ्रमणमा रहेको विषयमा मलाई पनि सामाजिक सञ्जालबाट मात्र थाहा भएको हो, अरू कुरा मलाई केही थाहा छैन । – युवराज विष्ट/रासस

कमेन्ट गर्नुहोस्