प्रदेश ५ सरकारका मुख्यमन्त्री शंकर पोखरेलले शून्य संरचनाबाट काम थाल्दै अघि बढेको प्रदेश सरकार नागरिकले सुन्ने र देख्ने विन्दुमा आइपुगेको बताएका छन् ।

उनले प्रदेश सरकार आधारभूत रुपमा अघि बढ्ने संरचना खडा गर्दै पूर्णतः क्रियाशील हुने वातावरण तयार भएको समेत बताएका छन् ।

मुख्यमन्त्री पोखरेलले प्रदेश स्थापना दिवसका अवसरमा शुक्रवार दिएको शुभकामना सन्देशमा जननिर्वाचित राजनीतिक नेतृत्वले शून्यबाट काम थाल्दै अघि बढ्दा आज २ वर्ष पुग्दासम्मको अवधिमा आफूलाई चाहिने आधारभूत कानून निर्माण भएको, प्रदेशको आवधिक योजना तयार भएको र कर्मचारी समायोजन टुंगो लागेर प्रशासनिक संरचनासमेत तयार भई क्रियाशील भएको उल्लेख गरेका छन् ।

उनले संघीय लोकतान्त्रिक गणतन्त्र केवल शासन प्रणालीका रुपमा मात्र नभई नागरिकको जीवन पद्धति र शैलीका रुपमा स्थापित हुनुपर्ने औंल्याएका छन् ।

संघीय लोकतान्त्रिक गणतन्त्र शासन प्रणालीका रुपमा मात्र नभई नागरिकको जीवन पद्धतिका रुपमा स्थापित गर्न सक्दा मात्रै आम नागरिकले लोकतन्त्रको सुखद अनुभूति गर्न पाउने हँुदा प्रदेश सरकार संघीय शासन व्यवस्थामार्फत जनआकांक्षा पूरा गर्न कृतसंकल्पित रहेको बताएका छन् ।

मुख्यमन्त्रीको शुभकामना सन्देशमा संविधानले ३ तहका सरकारबीच सहअस्तित्व, समन्वय र सहकार्यको परिकल्पना गरेको उल्लेख गर्दै प्रत्येक तहका एकलसहित साझा संवैधानिक अधिकार र दायित्व पूरा गर्न बुझाइमा एकरुपता, आपसी सामञ्जस्यता र सहकार्य जरुरी पर्ने बताए । 

उनले संविधानको मर्मलाई आत्मसात् गर्दै संघीयताको व्यावहारिक कार्यान्वयन गर्न सबैको सार्थक पहल आवश्यक रहेको औंल्याउँदै नागरिकको विकास र समृद्धिको आकांक्षालाई पूरा गर्न संघीयताको व्यावहारिक कार्यान्वयनलाई सरकारले पूर्णरुपमा ध्यान दिएको स्पष्ट पारेका छन् ।

संघीय सरकारले अघि सारेको समृद्ध नेपाल, सुखी नेपालीको लक्ष्य र समृद्ध प्रदेश, खुशी जनताको लक्ष्य बोकेर अघि बढेको प्रदेश सरकार उक्त लक्ष्य पूरा गर्न सार्थक योगदानका लागि संकल्पित रहेको स्पष्ट पारे ।

मुख्यमन्त्री पोखरेलले शुभकामना सन्देशमा प्रदेश स्थापना दिवसको ऐतिहासिक अवसरमा समृद्ध प्रदेशका माध्यमबाट समृद्ध राष्ट्र निर्माण गर्ने अभियानमा साथ दिन सम्पूर्णमा अपिल गरेका छन् ।