एमसीसी मात्रै होइन, सम्झौता त अरू पनि रैछन् - भीम रावल

अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) अध्ययन कार्यदलका सदस्य भीम रावलले एमसीसी मात्र नभएर दर्जन अरू सम्झौता रहेको खुलासा गरेका छन् ।

आइतवार कार्यदलको बैठकपछि सञ्चारकर्मीहरूसँग कुरा गर्दै रावलले अन्य सम्झौताको पनि अध्ययन हुँदै गरेको बताए ।


Advertisement

'संसदमा प्रतुत भएको त एउटा मात्र रैछ, अरू त एक दर्जन सम्झौता भइसकेको रहेछ,' रावलले भने, 'हामीले सबै सम्झौताको अधययन गरिरहेका छौं । प्रतिवेदनमा सबै समेटेर सार्वजनिक गर्छौं ।'

नेता रावलले अध्ययन कार्यदलले निष्कर्ष नदिने बेलासम्म कोही कसैले यसबारेमा बोल्न उपयुक्त नहुने बताए ।


Advertisement

कार्यदलले काम गरिरहेकै बेला नेकपाका अध्यक्ष तथा प्रधानमन्त्री केपी शर्मा ओलीले एमसीसी जसरी पनि पारित हुने वक्तव्य बारम्बार दिने गरेका छन् ।

रावलले प्रधानमन्त्री ओलीले बारम्बार एमसीसीका बारेमा गरेका टिप्पणी केन्द्रीय कमिटीको निर्णय विरुद्ध रहेको आरोप लगाए ।  

'कार्यादेश भन्दा फरक किसिमले अभिव्यक्ति दियो भने केन्द्रीय कमिटीलाई सम्मान गरेको हुँदैन,' रावलले भने, 'कार्यदलले अध्ययन पूरा नगरीकन निष्कर्ष सुनाउने अधिकार केन्द्रीय कमिटीले कसैलाई दिएको छैन ।'

कार्यदलको विपक्षमा कसैले बोलेदेखि त्यो केन्द्रीय कमिटीको निर्णय विपरित हुने उनले बताए ।

गत माघ १९ गते सम्पन्न भएको नेकपा केन्द्रीय कमिटीको दोस्रो पूर्ण बैठकले वरिष्ठ नेता झलनाथ खनालको संयोजकत्वमा तीन सदस्यीय कार्यदल गठन गरेको थियो ।

कार्यदलमा रावल र परराष्ट्रमन्त्रीसमेत रहेका प्रदीप ज्ञवाली सदस्य छन् ।

कार्यदललाई एमसीसी अध्ययन गरेर सुझाव प्रतिवेदन तयार गर्न १० दिनको म्याद दिइएको थियो । १० दिनभित्र कार्यदलले प्रतिवेदन तयार गर्न नसकेपछि पहिलोपटक फागुन १ गते १० दिनको म्याद थपिएको हो ।

 

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्