परराष्ट्रमन्त्री प्रदीपकुमार ज्ञवालीले चीनमा व्याप्त कोरोना भाइरस (कोभिड–१९)सँगको लडाइँका क्रममा चीनले गरिरहेको प्रयासमा नेपाल सधैँ साथ रहेको बताएका छन् ।

'चिनियाँ जनता, सरकार र त्यहाँको स्वास्थ्यकर्मी उच्च दक्षताका साथ जुन दृढ सङ्कल्पले लडिरहेका छन्, नेपाल सरकारले त्यो कठोर प्रयत्न र उच्च दक्षताको सराहना गर्न चाहन्छ,' उनले भने। बङ्गलादेशको दुईदिने भ्रमण सकेर बुधबार स्वदेश फर्केपछि त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा मन्त्री ज्ञवालीले चीनलाई परिरहेको सङ्कटमा नेपाल सधैं साथ रहने औँल्याए ।

कोराना भाइरसविरुद्ध चीन लडिरहँदा त्यसको प्रकोपमा परेका धेरै बिरामी निको हुँदै घर फर्र्कनुले नियन्त्रण प्रक्रिया शुरू भएको अनुभूति दिएको उनले प्रस्ट्याए । भाइरसका कारण मर्नेको सङ्ख्याभन्दा निको भएर घर फर्कनेको सङ्ख्याले उछिन्नु र थप सङ्क्रमित हुनेको सङ्ख्याको अनुपात पनि घट्दै जानु त्यसको सङ्केत रहेको मन्त्री ज्ञवालीको भनाइ छ ।

कोरोना भाइरसका कारण नेपालमा आउँदो चैतमा हुने सगरमाथा संवाद शृङ्खलालाई कुनै खालको प्रभाव नपार्ने उनले प्रस्ट्याए ।

आउने अतिथि सबैसँग परराष्ट्र मन्त्रालय सम्पर्कमै रहेको जानकारी दिँदै मन्त्री ज्ञवालीले सबैले आउने स्पष्ट पत्र पठाइसकेको उल्लेख गरे। उनका अनुसार बाँकी रहेकासँग पनि निरन्तर कुरा भइरहेको छ ।

नेपालले जलवायु परिवर्तन र मानव जातिको भविष्यका बारेमा विश्वव्यापी अवधारणा निर्माण गर्दै समाधानको पहलमा सघाउन सगरमाथा संवाद आयोजना गर्न लागेको हो ।

सञ्चारकर्मीको जिज्ञासाको जवाफ दिने क्रममा नेपाल–भारत सीमा समस्या वार्ताबाटै पहल गर्ने कुरामा भारतले सहमति जनाएकाले त्यसमा कुनै शङ्का नरहेको मन्त्री ज्ञवालीले स्पष्ट पारे ।

नयाँ वार्ताको मिति नेपालले पर्खिरहेको भन्दै उनले छिट्टै नै त्यो भारतले पठाउने विश्वास व्यक्त गरे। मन्त्री ज्ञवालीले एमसीसीको थप अध्ययन गर्न बनेको कार्यदलको म्याद फेरि थप गरी काम गरिरहेको जानकारी दिए । गोरखापत्र दैनिकमा खबर छ ।