अख्तियार दुरुपयोग अनुसन्धान आयोग सुर्खेतले भेरीगंगा नगरपालिकामा भएको बालुवा–गिट्टी प्रकरणबारे छानबिन थालेको छ ।

लोकान्तर डटकममा माघ १६ गते भेरीगंगा नगरपालिकाको ‘ठेक्कापट्टामा नगरलाई ३९ लाख नोक्सान, दिइएन सूचना’ भन्ने समाचार प्रकाशित गरेको थियो । 

नगरलाई नोक्सान भएको समाचार प्रकाशन भएसँगै अख्तियारले कागजात मगाएर छानबिन गरिरहेको अख्तियार स्रोतले लोकान्तरलाई जानकारी दिएको छ । छिन्चु तथा डुंगेखोलामा असोज १ गते गिट्टी बालुवाका लागि टेन्डर आह्वान भएको थियो ।

ठेक्कामा ३६ वटा बोलपत्र खरिद भएको थियो । मंसिर १ गते १४ कम्पनीले बोलपत्र दाखिल गरेका थिए । स्टार कन्सट्रक्सनले सबैभन्दा बढी ९१ लाख १९ हजार ९७८ रुपैयाँ १ पैसा कबुल गरेको थियो तर कम्पनीले बोलकबोल गरेपनि नवराज कन्सट्रक्सनमा ठेक्का सरेको थियो । उसले ८६ लाख ५१ हजार १५१ रुपैयाँ कबुल गरेको थियो । उसले पनि ठेक्का सकारेन । तेस्रो नम्बरमा एन्जल निर्माण सेवाले ८०  लाख ५२ हजार ३०० रुपैयाँमा बोलकबोल गरेको टेन्डर पाउनुपर्नेमा न्यू हरि निर्माण सेवाले ६५ लाख ४९ हजार ४५५ रुपैयाँमा टेन्डरको सम्झौता गर्‍यो ।

सोही मितिमा भेरी नदी तथा गोछे खोलामा पनि टेन्डर आह्वान भएको थियो । टेन्डरमा २९ जनाले बोलपत्र खरिद गरेकोमा ११ जनाले दाखिला गरे । ठेक्कामा न्यू हरि निर्माण सेवाले ७९ लाख ६७ हजार ९३० (भ्याट सहित) ठेक्का पायो तर उसले नगरसँग ठेक्का सम्झौता गरेन । दोस्रो नम्बरमा रहेको नवराज कन्सट्रक्सनले ठेक्का पायो । उनले ६३ लाख ९० हजार ७८२ रुपैयाँमा सम्झौता गरेको थियो ।

पहिलो नम्बरमा ठेक्का पार्ने कम्पनीले ठेक्का सम्झौता नगर्ने र अरुमा सारिदिने गर्दा नगरलाई नोक्सान हुने गरी ठेक्का सम्झौता भएको थियो । नगरपालिकाका नगर प्रमुख भूपेन्द्रबहादुर चन्द र उपप्रमुख रेणु आचार्यले नै ठेक्का सम्झौताबारे अनभिज्ञ रहेको जानकारी दिएका थिए ।

नगरलाई भएको नोक्सानीको विषयमा अख्तियारले गम्भीरताका साथ छानबिन गरिरहेको जनाएको छ । अख्तियारले पहिलो पटक कागजात मगाउँदा नगरपालिकाले भनेजति कागज उपलब्ध गराएको छैन । ‘हाल २ वटा निर्माण कम्पनीले मात्रै ठेक्का सम्झौता गर्न नसक्ने भन्दै पत्र पठाएको हामीलाई पठाइएको विवरणमा उल्लेख छ,’ अख्तियार स्रोतले भन्यो, ‘अन्य कागजात मगाएका छौं । आवश्यक छानबिन भइरहेको छ ।’