लगभग १७ वर्षअघि आएको फिल्म रामगोपाल वर्माको फिल्म भूत भारतीय सिनेमाको यादगार हरर फिल्म मानिन्छ । वर्षौंपछि करण जोहरको धर्मा प्रोडक्सनले विकी कौशल जस्तो उम्दा कलाकारलाई राखेर भूत फिल्म ल्याउँदा दर्शकहरू केही नयाँ देख्न पाइन्छ कि भनी सोच्छन् । तर पहिलोपटक निर्देशन गरिरहेका भानुप्रताप सिंहले यस फिल्ममा खासै केही पनि नयाँपन दिन सकेका छैनन् । 

शिपिङ अफिसर पृथ्वी (विकी कौशल) जिन्दगीको एक्लोपन र अवसादबाट मुक्त हुन खोज्दैछ । समुद्रको किनारमा ठूलो जहाज कुनै पनि क्रु मेम्बर विना आफैं आइपुगेको खबर उसले पाउँछ । सेवानिवृत्त हुन लागेका पृथ्वीका हाकिम चाहिँ यस जहाजबाट शीघ्र छुटकारा चाहन्छन् । 

उनीहरूले जहाजको खोजबिन गरिरहँदा पृथ्वीलाई अनौठा अनुभव हुन थाल्छन् । पृथ्वीलाई जहाजमा डर लाग्छ र घरमा पनि डर लाग्न थाल्छ । पृथ्वीलाई सी बर्ड नामक यो जहाजमा भूतप्रेतको छायाँ भएको थाहा लाग्छ । उसले भुताहा जहाजको छानबिन गर्दा भयानक वास्तविकता उजागर हुन्छ । छानबिनका क्रममा पृथ्वीको निजी जिन्दगीको दुःखद पक्ष पनि बाहिर आउँछ । 

फिल्म वास्तविक घटनामा आधारित भएको बताइएको छ । फिल्मको पहिलो तर्साउने दृश्यले दर्शकको चित्कार निकाल्छ तर फिल्म अघि बढ्दै जाँदा डर लाग्न छोड्छ ।

विकी कौशलको निजी जिन्दगीको पक्ष आमिर खानको तलाशको याद दिलाउँछ । फिल्मका केही दृश्यहरू तर्साउने भए पनि तिनमा नवीनता छैन । भूतको मेकअप तर्साउनु साटो हाँसउठ्दो छ । पार्श्व संगीतले डर उत्पन्न गर्छ । तर कमजोर स्क्रीनप्लेका कारण दृश्यहरू दोहोरिरहँदा दर्शकहरूलाई झिँझो लाग्छ । 

हरर फिल्मलाई सशक्त बनाउन कम्प्युटर ग्राफिक्सको उपयोग गरिएको छ तर त्यसमा दक्षता भेटिन्न । दोस्रो हाफमा कथा छितरिन्छ । क्लाइमेक्समा तान्त्रिक मन्त्रहरू पढ्न थालिन्छ जसले फिल्मलाई सामान्य बनाउँछ । फिल्मको अन्त्यमा दोस्रो भाग पनि आउने संकेत दिइएको छ । 

अपराधबोध र अवसादले ग्रस्त पृथ्वीको चरित्रलाई विकी कौशलले कुशलतापूर्वक निर्वाह गरेका छन् । डर र आश्चर्यका दृश्यहरूमा उनी जमेका छन् । क्यामियोमा भूमि पेडनेकरको भूमिका यादगार छ । आशुतोष राणा जस्ता वरिष्ठ कलाकारलाई चाहिँ सदुपयोग गर्न सकिएको छैन । सहायक कलाकारहरूको काम ठीकठाक छ ।

हरर फिल्मको सोख भएकाहरूले हेरे हुन्छ तर फिल्म मिस गर्दा पनि फरक पर्दैन ।

फिल्म : भूत पार्ट १ द हन्टेड शिप
कलाकार : विकी कौशल, आशुतोष राणा, भूमि पेडनेकर आदि
निर्देशक : भानुप्रताप सिंह
विधा : हरर
अवधि : दुई घन्टा १० मिनेट
रेटिङ : २.५/५

नवभारत टाइम्समा प्रकाशित समीक्षा