सेक्युरिटी प्रिन्टिङ प्रेस, वाइड बडी–न्यारोबडी जहाज खरिद तथा बालुवाटारको जग्गा लगायत विभिन्न घोटालाका मुख्य दोषिहरूलाई कारवाहीको माग गर्दै मानवअधिकार तथा शान्ति समाजले आइतवार प्रदर्शन गरेको छ ।

माथि उल्लेख गरिएकासहितका विभिन्न घोटालाका मुख्य दोषीहरूलाई कारवाहीको दायरामा ल्याउन र संसद्‍मा पेश भएका विधेयकहरूमा निहीत स्वतन्त्रताविरोधी प्रावधान हटाउन मागसहित आइतवार माइतीघर मण्डलामा प्रदर्शन गरेको समाजकी कार्यक्रम अधिकृत सरिता पौडेलले जानकारी दिइन् ।

घोटालाको पछिल्लो संस्करण सेक्युरिटी प्रिन्टिङ प्रेस खरिदमा तत्कालीन मन्त्री एवं सरकारका प्रवक्ता गोकुल बाँस्कोटा मुछिएकाले यसको गहिराईमा छानबीन गरि कारवाही प्रक्रिया अघि बढाउन शान्ति समाजले माग गरेको छ ।

प्रदर्शनमा समाजका संस्थापक सभापति कृष्ण पहाडी, सभापति उत्तम पुडासैनी, संस्थापक महासचिव सुवास ढकाल, सल्लाहकार होमकान्त चौलागाईं, उपसभापति रेनुका पौडेल, सचिवहरू रत्नलक्ष्मी श्रेष्ठ र बलबहादुर गाहा मगर, कोषाध्यक्ष रामकृष्ण बराल, केन्द्रीय सदस्यहरू गीता तिमिल्सिना, सरस्वती ढकाल, नम्रता खरेल, काठमाडौं शाखा सभापति जगन्नाथ पुडासैनी, ललितपुर शाखा सभापति चन्द्रमणी बञ्जारा लगायत दर्जनौं अधिकारकर्मीको सहभागिता थियो ।