टर्कीको पूर्वी भागमा रहेको भान प्रान्तमा आइतवार भूकम्प आएपछि कम्तीमा आठजनाको मृत्यु भएको छ भने लगभग दुई दर्जन मानिस घाइते भएका छन् । 

भूकम्पको म्याग्निच्युड ५.७ रहेको सरकारी अधिकारीहरूले बताए । 

गृहमन्त्री सुलेमान सोयलुले मृतकहरूमा कम्तीमा तीनजना शिशु रहेको बताए । एक हजारभन्दा बढी भवनहरू भत्केको र खोजी तथा उद्धार कारवाही चलाइएको जानकारी पनि उनले दिए । 

टर्की र इरानको सीमामा रहेको क्षेत्रमा लगभग ४३ गाउँलाई भूकम्पले असर पारेको टर्कीका सञ्चारमाध्यमले जनाएका छन् । इरानका केही क्षेत्रमा पनि भूकम्पले असर पारेको तर कुनै हताहती भए नभएको खबर नपाइएको बताइएको छ । 

पूर्वी टर्कीमा एक महिनाअघि आएको भूकम्पमा ४० भन्दा बढी मानिसको मृत्यु भएको थियो ।