नेपाल हवाइ खेलकुद संस्था (ना) को आयोजनामा पोखरामा आइतवारदेखि एसियन टूर प्याराग्लाइडिङ वर्ल्डकप प्रतियोगिता शुरु भएको छ ।

नेपाल प्याराग्लाइडिङ तथा ह्याण्डग्लाइडिङको सहयोगमा भएको सो प्रतियोगितामा २० देशका ९० जना प्रतियोगीले भाग लिएका छन् ।

विश्वकपमा फेडेरेसन अफ एरोनोटिक इन्टरनेशनल (एफएआइ)बाट मान्यता प्राप्त पाइलटले मात्र सो प्रतियोगितामा भाग लिन पाउने व्यवस्था छ ।

आयोजक संस्था नाका निवर्तमान अध्यक्ष एवं संयोजक योगेश भट्टराईले पहिलो दिन पाइलटलाई वर्ल्डकप टूरबारे जानकारी दिने उद्देश्यले ब्रिफिङ गरिएको बताए ।

उनले सोमवारदेखि प्रतिस्पर्धा शुरु हुने र प्रत्येक दिन फरक–फरक 'टास्क' हुने बताए । यसअघि पोखरामै एएफएआइट–२ क्याटगोरीको प्याराग्लाइडिङ प्रि–वर्ल्डकप आयोजना भइसकेको छ ।

निरन्तर २ वर्षसम्म प्रि–वर्ल्डकप आयोजनापछि एफएआइले विश्वकपको लागि स्वीकृति प्रदान गरेको हो । प्रतियोगितामा नेपालसहित भारत, अमेरिका, कोरिया, फ्रान्स, जापान, कोरिया, बेलायत, इरान, चेकोस्लोभाकिया, स्वीस, अष्ट्रिया लगायतका पाइलटले भाग लिएका छन् ।

नेपालका मात्र १२ जना पाइलटले भाग लिएका छन् । कोरोना प्रभावका कारण छिमेकी देश चीनका पाइलट आएनन् । पोखराको चुली सराङ्कोटबाट उडान भरेर पाइलट फेवाताल किनार खपौंदीमा अवतरण गर्ने छन् ।

नाका अध्यक्ष कृष्ण भण्डारीले विश्वकप टूरमा पाइटलले उपाधिसँगै अंक पाउने बताए । प्राप्त अंककै आधारमा एएफएआईले पाइलटको ¥याङकिङ गर्ने उनले जनाए । एक सातासम्म हुने खेलमा सम्भावित दुर्घटना रोक्न नेपाली सेनाले आपतकालीन व्यवस्था तयार पारेको छ ।