राष्ट्रिय प्रजातन्त्र पार्टी नेपालका अध्यक्ष कमल थापाले एम्बुसमा पारेर विस्थापित गरिएको राजतन्त्रलाई स्थापित गर्नुपर्ने बताएका छन् ।

सोमबार राप्रपा नेपालको निर्वाचन अभिमुखिकरण बैठकमा कर्णाली प्रदेशको राजधानी वीरेन्द्रनगर आइपुगेका अध्यक्ष थापाले पत्रकार सम्मेलनमा नेपालको भूराजनीतिक अवस्थाका कारण देशमा राजतन्त्रको आवश्यकता रहेको दाबी गरेका हुन् ।

‘अहिलेका परिवर्तनकारी भन्नेहरू, गणतन्त्रवादी भन्नेहरू सबैको अभिभावकको रुपमा राजा ल्याउनुपर्छ भनिरहेका छौं । संविधान र संसदको नियन्त्रणमा रहने राजतन्त्र स्थापना गर्नुपर्छ भन्ने हाम्रो स्पष्ट दृष्टिकोण हो । पृथ्वीनारायण शाहको बंशज नै राजा हुनुपर्ने र संसद र संविधानको अवमूल्यन गरेको खण्डमा अर्को व्यक्तिलाई राजा बनाउन सक्ने खालको व्यवस्था हामीले खोजेका हौं,’ उनले भने, ‘संसदले अयोग्य ठहराएमा राजा फेर्न सकिने गरी हामीले हिन्दु राष्ट्र र राजसंस्थासहितको लोकतन्त्रको पक्षमा आवाज उठाइरहेका हौं ।’

उनले अहिले संविधान संशोधन गर्न सत्तारुढ नेकपाले खोजिरहेको बताउँदै नेकाको उक्त कदम काम कुरो एकातीर कुम्लो बोकी ठिमीतिर भनेजस्तै भएको बताए ।

‘संविधान संशोधन नै गर्ने भए नेपाललाई हिन्दु राष्ट्र बनाऔं । राजसंस्थाको पुर्नस्थापना गरौं,’ उनले भने, ‘जननिर्वाचित व्यक्ति मात्रै कार्यारी प्रमुख हुने व्यवस्था संविधानमा उल्लेख छ । संविधान निर्माताको परिकल्पना निर्वाचन हारेकालाई प्रधानमन्त्री बनाउने होइन । सत्तारुढ नेकपाले विना अर्थमा संविधान संशोधनको तयारी गरेको हाम्रो ठहर छ ।’

पार्टी एकताको ढोका खुल्ला

अध्यक्ष थापाले राप्रपा संयुक्तसँग एकताको लागि ढोका खुल्लै रहेको बताएका छन् । ‘हामी बीचमा पार्टीको सिद्धान्त, विचार, चुनाव चिन्ह, नेतृत्व, संरचना सबैमा सहमति भइसकेको छ ।

गएको चुनावमाहामीले थोरै मत पाउनुकोकारण हामीमा एकता नभएका कारण हो ।’ उनले भने, ‘अहिले हामी संगठन निर्माणमा हिडेका छौं । उहाँहरूलाई हामी स्वागत गर्न तयार छौं ।’ उनले पार्टीले तीन लाख सक्रिय सदस्य बनाउने र आगामी महाधिवेशनमा महाधिवेशन प्रतिनिधि प्रत्यक्ष चुनिएर आउने व्यवस्था गरिएको बताए ।

‘काँग्रेस र नेकपा सिद्धान्तविहीन भइसकेका छन् । बैकल्पिक शक्ति अबको हामी नै हो ।’ उनले भने, ‘बैकल्पिक क्षमता र चरित्र राप्रपासँग छ ।’

देशमा भ्रष्टाचार बढिरहेको बताउँदै अध्यक्ष थापाले धर्म परिर्वतन, बेरोजगारी समस्या, बाह्य शक्तिको दबाब र प्रभाव पनि बढिरहेको बताए । त्यहि कारण पनि नेपालमा राजसंस्था सहितको लोकतन्त्र आवश्यक रहेको आफूहरूको बुझाइरहेको थापाको भनाइ छ ।