चीनका राष्ट्रपति सी चिनफिङले कोविड–१९ भनिने कोरोनाभाइरस चीनको अहिलेसम्मकै सबभन्दा ठूलो स्वास्थ्य संकटकाल भएको स्वीकारेका छन् । 

आइतवार एक बैठकलाई सम्बोधन गर्ने क्रममा कोरोनाले देशको अर्थव्यवस्थालाई व्यापक रूपमा प्रभावित पार्ने बताए । 

कोरोनाका कारण चीनमा २४ सय ४२ जनाले ज्यान गुमाइसकेका छन् भने ७७ हजारजना यसबाट संक्रमित छन् । 

कोरोनाको केन्द्रविन्दु रहेको हुबेई प्रान्तमा लकडाउन गरिएको छ । 

कोविड–१९ को नियन्त्रण र रोकथाम प्रयाससम्बन्धी बैठकमा सीले भने, ‘महामारी तीव्र गतिमा फैलिरहेको छ, संक्रमण व्यापक छ र यसको नियन्त्रण तथा रोकथाम कठिन छ ।’

सरकारी सञ्चारमाध्यम सीसीटीभीका अनुसार सीले भने, ‘यो हाम्रो लागि संकटको स्थिति हो र कठिन परीक्षा पनि ।’

यो बैठक टेलिकन्फरेन्सिङ मार्फत गरिएको हो । त्यसको अध्यक्षता प्रधानमन्त्री ली खछ्याङले गरेका हुन् । 

अहिलेको संकटको स्थिति केही समयका लागि मात्र रहने र त्यसमाथि नियन्त्रण कायम गर्ने पनि उनले बताए । 

कोरोनाबाट निको भइरहेका मानिसको संख्या पनि बढिरहेको बताइएको छ । वुहानमा मात्र १५ हजार २९९ जना निको भइसकेका छन् । निको भएकालाई अस्पतालबाट छुट्टी दिइएको छ तर १४ दिनसम्म एक आइलोसेन सेन्टरमा बस्न भनिएको छ ।