इजरायली सेनाको बुलडोजरले मृत प्यालेस्टाइनीलाई भुइँबाट उठाएको एक भिडियो भाइरल भएपछि इजरायली सेना र प्यालेस्टाइनी लडाकूहरूबीच गोली हानाहान भएको छ । 

लडाकूहरूले आइतवार बेलुका इजरायलतिर २० भन्दा बढी रकेट प्रहार गरेको इजरायली सेनाले जनाएको छ । कैयौं महिनापछि लडाकूहरूले गरेको यो सबभन्दा ठूलो आक्रमण हो । रकेट आक्रमणबाट कुनै इजरायलीलाई चोटपटक लागेको खबर छैन । 

इस्लामिक जिहादका अड्डाहरूमा शृंखलाबद्ध आक्रमण गरेको इजरायलले जनाएको छ । यो समूह गाजामा रहेका दुई प्रमुख लडाकू समूहमध्ये एक हो । इस्लामिक जिहादले रकेट आक्रमण गरेको इजरायली सेनाका प्रवक्ता लेफ्टिनेन्ट कर्नेल जोनाथन कोनरिकसले बताए । 

आइतवार बिहान दुईजना मानिसले गाजा र इजरायललाई छुट्ट्याउने पर्खाल नजिक बम राखेको देखेपछि आफूहरूले गोली चलाएको इजरायली सेनाको भनाइ छ । ती दुईजनाले बम राख्ने काम गरेको भिडियो इजरायली सेनाले सार्वजनिक गरेको छ । गोली लागेर दुईमध्ये एकको ज्यान गएको छ । 

मृतक पुरुषको नाम मोहम्मद अल–नाइम हो । इस्लामिक जिहादको सशस्त्र संगठन कुद्स ब्रिगेडले मारिने व्यक्ति आफ्ना एक लडाकू भएको जनाएको छ । 

अर्का व्यक्तिलाई गम्भीर चोटपटक लागेका कारण गाजा अस्पतालमा उपचार गरिएको छ । 

मृत व्यक्तिलाई इजरायली बुलडोजरल उठाउन खोजेको र त्यसक्रममा गोली चलाइएपछि असफल भएको अनि अन्ततोगत्वा शरीर उठाएर इजरायलतर्फ लगिएको भिडियोमा देखिन्छ ।