बुटवल उपमहानगरपालिकाले शिक्षा योजना तयार पारेको छ । 

आगामी ५ वर्ष भित्रमा प्रत्येक बालबालिका, व्यक्ति र समुदायलाई उत्पादनमूलक तथा व्यावहारिक शिक्षाको पहुँच पुर्‍याउने दूरदृष्टि रहेको ‘बुटवल शिक्षा योजना’ सोमवार सार्वजनिक गरिएको छ । 

उपमहानगरमा सोमवार एक समारोहबीच प्रमुख शिवराज सुवेदीले शिक्षा योजना सार्वजनिक गर्दै शिक्षालाई पहिलो प्राथमितामा राखेको बताए । उनले सबल आर्थिक केन्द्र समुन्नत बुटवलमार्फत समृद्ध बुटवल, सुखी जनताको लक्ष्य हासिल गर्ने गरी बुटवल उपमहानगरले आवधिक र दीर्घकालीन महत्त्वका योजना तय गरेको उल्लेख गर्दै सहकार्यका साथ कार्यान्वयन गरिने बताए । 

उनले शिक्षा योजना तयार पार्ने क्रममा सरिक भएका विभिन्न विषयका विज्ञ, प्राविधिक, शिक्षासँग सरोकारवाला लगायत सबैलाई धन्यवाद ज्ञापन गर्दै कार्यान्वयनमा पनि सबैको सहकार्य र सहयोगको खाँचो रहेको बताए । उत्पादनमूलक तथा व्यावहारिक, सीपयुक्त व्यावसायिक र प्राविधिक शिक्षाको पहुँच सबैमा पुर्‍याउने योजनाको दूरदृष्टिलाई साकार पार्नेतर्फ केन्द्रित हुन उनले सबै सरोकारवालाहरुलाई आग्रह गरे ।

राष्ट्रिय तथा अन्तर्राष्ट्रिय रूपमा देखिएको वर्तमान शिक्षाको व्यवस्थापन र गुणस्तरीयताको चुनौतीलाई सामना गर्दै विकसित भइरहेको नयाँ–नयाँ प्रविधि र ज्ञानविज्ञानको क्षेत्रलाई समेट्दै सम्पूर्ण बालबालिका, युवा तथा ज्येष्ठ नागरिकहरूको समेत मैलिक आधिकारको संरक्षण गर्दै उनीहरूलाई सहज, सुलभ, सरल तथा आवश्यकता अनुसार शिक्षा प्रदान गर्नकै लागि २०७६/७७ देखि २०८०/८१ सम्मको पञ्चवर्षीय शिक्षा योजना सरोकारवाला पक्षको सहभागितामा तयार पारिएको प्रमुख सुवेदीले बताए  ।

नगरपालिकाभित्रका शैक्षिक मुद्दा तथा चुनौतिहरूलाई प्राथमिकताका आधारमा समाधान गर्नका निमित्त प्रदेश तथा नगरपालिका सम्बद्ध जनप्रतिनिधि, वडा शिक्षा समिति, विद्यालय, प्राविधिक तथा सीपमूलक शिक्षण संस्था, विद्यालय व्यवस्थापन समिति, प्रधानाध्यापक, शिक्षक, अन्य सम्वद्ध शैक्षिक संस्थाको अन्तर्क्रिया, छलफल सम्पन्न गरी योजनाको निर्माणमा प्राथमिकता प्रदान गरिएको शिक्षा, स्वास्थ्य तथा जनसंख्या महाशाखा प्रमुख मित्रमणि खनालले जानकारी दिए ।