प्रहरी नायव महानिरीक्षक (डीआईजी) विश्वराज पोखरेलले सडकमा देखिने प्रहरी सरकारको पहिलो तस्बिर रहेको बताएका छन्।

उपत्यकामा सञ्चालित प्रहरी संयुक्त मेश सुधार अभियान अन्तर्गत सोमबार महानगरीय प्रहरी प्रहरी वृत्त सातदोबाटोमा प्रहरी अधिकृत एवं जवान संयुक्त मेशको शुभारम्भ गर्दै पोखरेलले प्रहरी जनताको सुखदुःखको सारथी भएको कारण सडकमा देखिने प्रहरी सरकारको पहिलो तस्बिर भएकाले संवेदनशिल हुन निर्देशन दिएका हुन्।

डीआईजी पोखरेले प्रहरीमा आउने हरेक किसिमका नागरिकहरुको भावनाको कदर गर्न प्रहरी सक्षम हुनुपर्ने र राज्यको अभिन्न अंग प्रहरी भएको बताउँदै उच्च मनोबलका साथ कानुन कार्यान्वयनमा कठोर बन्न निर्देशन दिए। 

समुदायसँग प्रत्यक्ष रहेर जनता र प्रहरी मिलेरै समाजका सबै खाले अपराध र विकृति-विसंगति अन्त्य गर्न सकिने उनको भनाइ थियो।

ठूलो संख्यामा  रहेका जवानर हवल्दार र चौविसै घण्टा डिउटीमा खटिने कर्मचारीलाई गुणस्तरीय खाना, सफा मेश तथा व्यारेक भवन लगायतका सेवा सुविधाहरू उपलब्ध गराए मात्र त्यस कर्मचारीहरूबाट प्रदान हुने सेवा प्रवाह अझबढी स्तरीय र प्रभावकारी हुने अपेक्षा रहेको डिआईजी पोखरेलले बताए ।
  
यसअघि प्रहरी कर्मचारीका लागि सिनियर प्रहरी अधिकृत, जुनियर प्रहरी अधिकृत र जवान हवल्दार गरी ३ तहको मेश सञ्चालन हुँदै आएको थियो।

यसरी सञ्चालनमा आएको मेश प्रणालीबाट तल्लो दर्जाको मेशमा अपेक्षित सुधार हुन नसकेको तथ्यलाई आत्मसाथ गरी सम्पूर्ण मातहत कार्यालयहरुमा अधिकृत जवानहरुको साझा तथा स्तरीय मेश निर्माणरसुधार अभियान शुभारम्भ गरिएको उनले बताए।

मेशको निर्माण र सुधार गर्ने अभियानका लागि महानगरीय प्रहरी वृत्त सातदोबाटोका प्रहरी नायव उपरीक्षक मित्रबन्धु शर्मासहित ४ जना प्रहरीलाई पुरस्कृत समेत गरिएको छ।