२०७३ साउन १ गतेदेखि ०७६ माघको २२ गतेसम्ममा राष्ट्रिय ट्रमा सेन्टरले १४ सय ५० जना बिरामीलाई औषधि उपचारमा छूट दिएको छ । सेन्टरमा उपचार गर्न आउने बिरामीहरूलाई विभिन्न स्किममा छूट दिने गरेको अस्पतालले जनाएको छ ।

लोकान्तरलाई प्राप्त सूचनाअनुसार सेन्टरले पछिल्लो साढे ३ वर्षमा ८ वटा स्किममा बिरामीहरूलाई छूट उपलब्ध गराउने गरेको छ । उपचारमा छूट पाउनेहरूमा अति गरीब, वृद्ध, प्राकृतिक दुर्घटनामा परेकाहरू, अस्पतालका कर्मचारीहरू र सेन्टरका निर्देशकले सिफारिस गरेका बिरामीहरू रहेको सेन्टरले जनाएको छ ।

ट्रमा सेन्टरबाट पछिल्लो साढे ३ वर्षको अवधिमा १८ जना वृद्ध, ८ जना अपाङ्ग र ५ सय ५७ जना अति गरीबले उपचारमा सहुलियत पाएका छन् । सोही अवधिमा ३ सय ६८ जना प्राकृतिक दुर्घटनाबाट पीडित र १ सय २१ जना बिरामीले पूर्ण निःशुल्क उपचार पाएको सेन्टरले जनाएको छ ।

सवारी दुर्घटनामा सवारी धनीका तर्फबाट नतिरिएको रकम समेत सेन्टरले बेहोरको देखिन्छ । माथिल्लो सगरमाथा बस व्यवसायीको समितिको सवारी साधनबाट दुर्घटनामा परेका १८ जना र पश्चिमाञ्चल बस व्यवसायी समितिको बस दुर्घटनामा घाइते भएका २ जना बिरामीले उपचारमा सहुलियत पाएका छन् ।

‘सवारी साधन दुर्घटनामा परी आकस्मिकरूपमा उपचारमा आएका बिरामीहरूको प्रारम्भिक उपचार सेन्टरले गरेको बस व्यवसायी समितिले भुक्तान गर्नुपर्ने भएतापनि भुक्तान नगरेकोले उक्त खर्च सेन्टरले बेहोरेको हो,’ ट्रमा सेन्टरका सूचना अधिकारी अर्जुनप्रसाद भेटवालले बताए ।

२ सय २२ जनाले सेन्टरका निर्देशकको सिफरिसमा छूट पाएका छन् भने सेन्टरमा कार्यरत १ सय ३६ जना कर्मचारीहरूले उपचारमा छूट पाएको सेन्टरबाट प्राप्त सूचनामा उल्लेख गरिएको छ । 

२ वर्ष अगाडिसम्म मात्रै अस्पतालमा कार्यरत कर्मचारीहरूले उपचारमा सहुलियत लिएको अहिले सबै कर्मचारीले बिमा गरेका कारण उपचार सहुलियत लिने नगरेको सूचना अधिकारी भेटवालले बताए ।

अस्पतालको आन्तरिक आम्दानीबाट नै उपचारमा सहुलियतको व्यवस्था गरेको र उपचार सहुलियतका लागि नेपाल सरकारका तर्फबाट थप अनुदान आवश्यक नपरेको सूचना अधिकारी भेटवालको भनाइ छ ।