वामदेवलाई राष्ट्रिय सभा सदस्य नियुक्त गर्न सरकारलाई नेकपाको सिफारिस

ईश्वर अर्याल
ईश्वर अर्याल

पत्रकार अर्याल लोकान्तरका लागि राजनीति, समसामयिक घटनाक्रम र वैदेशिक रोजगारीमा रिपोर्टिङ गर्छन् ।

सत्तारुढ दल नेपाल कम्युनिस्ट पार्टी (नेकपा)ले उपाध्यक्ष वामदेव गौतमलाई राष्ट्रिय सभा सदस्यमा मनोनित गर्नका लागि सरकारलाई सिफारिस गरेको छ ।

प्रधानमन्त्रीको सरकारी निवास बालुवाटारमा बुधवार बसेको पार्टी सचिवालय बैठकले उपाध्यक्ष गौतमलाई राष्ट्रिय सभामा राष्ट्रपतिबाट मनोनित हुने कोटाबाट सदस्य मनोनित गर्ने गरी सिफारिस गर्न सरकारलाई अनुरोध गर्ने निर्णय गरेको प्रवक्ता नारायणकाजी श्रेष्ठ ‘प्रकाश’ले जानकारी दिए ।


Advertisement

'पार्टीका केन्द्रीय उपाध्यक्ष कमरेड वामदेव गौतमलाई मन्त्रिपरिषद्को सिफारिसमा राष्ट्रपतिबाट मनोनित हुने सदस्यमा सिफारिसका लागि सरकारलाई अनुरोध गर्ने निर्णय बैठकले गरेको छ,' प्रवक्ता श्रेष्ठले भने ।

उपाध्यक्ष गौतमले राष्ट्रिय सभा सदस्य पनि प्रधानमन्त्री बन्न सक्ने व्यवस्था संविधानमा नगरिँदासम्म राष्ट्रिय सभामा नजाने अडान लिँदै आएका थिए ।


Advertisement

सोही प्रयोजनका लागि गठन गरिएको भनिएको कार्यदललाई प्रवक्ता श्रेष्ठले सामान्य समझदारीको विषयका रूपमा मात्र अर्थ्याए । त्यस किसिमको कुनै कार्यदल नरहेको उनको भनाइ थियो ।

राष्ट्रिय सभामा अर्थमन्त्री डा. युवराज खतिवडाको २ वर्षे कार्यकाल यही फागुन २० गते सकिँदैछ । खतिवडा राष्ट्रपतिबाट मनोनित सदस्य भएकाले उनको ठाउँमा राष्ट्रपतिले फेरि सदस्य मनोनित गर्नुपर्ने हुन्छ ।

अब मनोनित हुने सदस्यको कार्यकाल भने ६ वर्षको हुनेछ ।

ईश्वर अर्याल
ईश्वर अर्याल

लेखकबाट थप...

कमेन्ट गर्नुहोस्