शहरी विकास राज्यमन्त्री रामवीर मानन्धरले देशको नेतृत्वकर्ता र व्यवस्थापकबीच कामको तालमेल हुन सकेमा मुलुकलाई स्वर्ग बनाउन सकिने बताएका छन् ।

शनिवार १६ औं राष्ट्रिय युवा इन्जिनीयर सम्मेलनको अवसरमा आयोजित कार्यक्रममा मन्त्री मानन्धरले राजनीतिक तहबाट आएका विकासका खाकालाई मूर्त रुप दिन व्यवस्थापकहरू सचेत ढंगले लाग्नुपर्ने बताए ।

मन्त्री मानन्धरले ‘सुखी नेपाली : समृद्ध नेपाल’को राष्ट्रिय आकांक्षा पूरा गर्नका लागि सबै पक्षको सहयोग आवश्यक रहेको समेत बताए । नेपाल विश्वकै सबैभन्दा सुन्दर मुलुक भएको बताउँदै केही वर्ष सबै मिलेर मिहिनत गर्न सके समृद्धि समेत हासिल हुने बताए ।

मन्त्री मानन्धरले नेपाल पृथ्वीको स्वर्ग भएको बताउँदै स्वर्गलाई समृद्धिले भरिपूर्ण बनाउने दायित्व सबैको काँधमा भएको बताए । नेपाल जस्तै जैविक विविधताले भरिपूर्ण मुलुक विश्वमा अर्को नभएको बताउँदै अब प्रकृतिले दिएका उपहारलाई समृद्धिको माध्यम बनाउनुपर्ने बताए ।

प्रकृतिले दिएका उपहारसँगै पुर्खाको पौरख पनि रहेको बताउँदै मन्त्री मानन्धरले नेपालको मौलिक कला र संस्कृति पनि विश्वका लागि अध्ययनको क्षेत्र भएको बताए । प्राकृतिक सम्पदा र सांस्कृतिक धरोहरहरूका कारण नेपालले विश्वकै ध्यान केन्द्रीत गरिरहेको बताउँदै मन्त्री मानन्धरले अब नेपालीहरुका बीचमा केही गरौं भन्ने भावना र विकासको चाहना तीव्र हुनुपर्ने बताए । 

वर्तमान सरकार जनताको आशालाई विश्वास र व्यवहारमा परिणत गर्न लागिपरेको उल्लेख गर्दै मन्त्री मानन्धरले विकासका खाका कार्यान्वयनमार्फत अघि बढिरहेको बताए ।

कार्यक्रममा मन्त्री मानन्धरले देश विकासका लागि राजनीतिक र प्रशासनिक तहबाट बनेका योजनाको नक्सा डिजाइन गर्ने काम इन्जिनीयरको भएको बताउँदै समृद्ध नेपाल निर्माणमा इन्जिनीयरको भूमिका अतुलनीय रहने बताए । कहिलेकाहीँ गलत इन्जिनीयरिङका कारण विकासका संरचना भताभुङ्ग हुने गरेको बताउँदै मन्त्री मानन्धरले सचेत भएर काम गर्न पनि आग्रह गरे ।

काठमाडौंको कालिमाटीस्थित पुलको उदाहरण दिँदै मन्त्री मानन्धरले कतै–कतै गलत इन्जिनीयरिङका कारण समस्या परेको बताए । आइतवारदेखि शुरू हुने युवा इन्जिनीयरको सम्मेलनमा १ हजार ६०० ईन्जिनियर सहभागि हुँदैछन् ।