सर्वसाधारण जनताले सरकारबाट विभिन्न सेवामा सुविधा खोज्छन् । कतिपय देशले आधारभूत सेवासुविधामा केही छूट दिएर जनकल्याणका काम गरिरहेका बेला संसारको एउटा देशले २४ घण्टै बस, रेल लगायत यातायात सेवा निःशुल्क घोषणा गरेको छ ।

युरोपको देश लक्जमवर्गले २९ फेब्रुअरी शनिवारदेखि लागू हुने गरी निःशुल्कको घोषणा गरेको हो । 

लक्जमवर्गमा करीब ६ लाख जनता रहेका छन् । लक्जमवर्गका सीमा जर्मनी, बेल्जियम र फ्रान्ससँग जोडिएका छन् । सरकारले २४ घण्टै रेल, बस लगायत यातायात सेवा निःशुल्क गर्ने घोषणा गरेको छ ।

लक्जमवर्गको पब्लिक वर्क्स मन्त्री फ्रान्कोइस बोसले सन् २०२० लीप वर्ष भएको र यसलाई मनाउन २९ फेब्रुअरी अर्थात् शनिवारदेखि निःशुल्क घोषणा कार्यान्वयन गरिएको बताए । 

अन्तर्राष्ट्रिय सञ्चारमाध्यमका अनुसार लक्जमवर्गमा गगठबन्धन सरकार रहेको छ । सेन्ट्रिस्ट डेमोक्रेटिक पार्टी र लेफ्ट सोसलिस्ट वर्कर्स तथा ग्रिन्स पार्टी मिलेर सरकार चलाइरहेका छन् ।

सरकारले यातायात सेवा निःशुल्क गर्नुको पछाडि धनी र गरीबबीचको अन्तरलाई कम गर्नु रहेको जनाएको छ । यातायात निःशुल्क गर्दा ट्राफिक चापको समस्या समेत समाधान हुने सरकारको अपेक्षा छ ।

केही वर्षयता लक्जमवर्गले आर्थिक प्रगति गरिरहेको छ । जसले गर्दा सवारीसाधनको चाप बढेसँगै ट्राफिक व्यवस्थापनको समस्या निम्तिएको छ । लक्जमवर्गमा ५ जनामध्ये १ जनाले मात्रै सार्वजनिक यातायातमा यात्रा गर्र्ने पाइएको छ ।