अमेरिकाको जासुसी संस्था सीआईएलाई ओसामा बिन लादेन लुकेको ठाउँको जानकारी दिने एक पाकिस्तानी चिकित्सकले आफू बसेको कारागार कक्षमा भोक हडताल थालेको उनका वकिल र परिवारले सोमवार बताएका छन् । 

शकिल अफ्रिदी वर्षौंदेखि जेलमा छन् । उनको झूटो खोप कार्यक्रमबाट अमेरिकी एजेन्टहरूले अलकायदाका नेता लादेनलाई सन् २०११ मा पत्ता लगाएर मारेका थिए । 

‘उनी र उनको परिवारविरुद्ध गरिएका अन्याय र अमानवीय गतिविधिको विरोध गर्नका लागि उनी भोक हडतालमा छन्, उनका भाइ जमिल अफ्रिदीले भने । 

उनका वकिल कमर नदीमले पनि भोक हडतालको पुष्टि गरे । 

आतंकवादीहरूसँग सम्बन्ध राखेको कसूर ठहर गरेर सन् २०१२ को मे महिनामा शकिललाई ३३ वर्षको कारावास सजाय दिइएको थियो । 

पछि उनको सजाय घटाएर २३ वर्षमा झारियो । 

केही अमेरिकी सांसदहरूले उनलाई लादेन खोज्न मद्दत गरेकोमा प्रतिशोध लिनका लागि जेल हालिएको बताए । 

सन् २०११ मा पाकिस्तानी भूमिमा ओसामा बिन लादेनलाई अमेरिकी सेनाले मारेपछि पाकिस्तान र त्यहाँको शक्तिशाली सेनाले निकै बेइज्जती सहनुपरेको थियो । 

वर्षौंसम्म शकिल अफ्रिदीलाई वकिलमा पहुँच दिइएन अनि उनको पुनरावेदनको सुनुवाएलाई टार्ने काम भइरह्यो । 

उनको परिवारले समेत आफूहरूलाई तारो बनाइएको र अधिकारीहरूले दुःख दिएको बताए । 

अमेरिकाका राष्ट्रपति डोनल्ड ट्रम्पले राष्ट्रपति निर्वाचनका बेलामा शकिल अफ्रिदीलाई रिहा गर्न पाकिस्तानलाई दबाब दिने प्रतिज्ञा गरेका थिए तर राष्ट्रपति बनेपछि उनले यस विषयमा कुनै कुरा उठाएका छैनन् ।