मच्छिन्द्र क्लब इलाममा जारी माइभ्याली गोल्डकपको फाइनलमा प्रवेश गरेको छ। बुधबार भएको पहिलो सेमिफाइनल खेलमा भारतको मानेभञ्जाङ फुटबल क्लब दार्जिलिङलाई ३–० गोल अन्तरले पराजित गर्दै मच्छिन्द्रले फाइनल यात्रा तय गरेको हो।

खेलको १९औँ मिनेटमा मच्छिन्द्र क्लबका रेजिन सुब्बाले पहिलो गोल गर्दै टिमलाई अग्रता दिलाए। खेलको २१औँ मिनेटमा रजिन धिमालले प्रहार गरेको कर्नरमा मच्छिन्द्रका विदेशी खेलाडी अडेलाजा सोमेडेले दोस्रो गोल गर्दै अग्रता दोब्बर पारे। मच्छिन्द्रका रजिन सुब्बाले नै खेलको ८७औँ मिनेटमा तेस्रो गोल गरे। 

खेलको ‘म्यान अफ दि म्याच’ मच्छिन्द्रका देवेन्द्र तामाङ घोषित हुँदै १० हजार प्राप्त गरे। यससँगै माइभ्यालीको छैटौँ संस्करणबाट चारवटै विदेशी टिम बाहिरी सकेका छन्। 

बिहीबार आयोजक माइभ्यली फुटबल क्लब र त्रिभुवन आर्मीबीच दोस्रो सेमिफाइनल खेल हुनेछ। २४ गतेसम्म चल्ने गोल्डकपको विजेताले ८ लाख र उपविजेताले ५ लाख प्राप्त गर्नेछ।