राजधानी काठमाडौं उपत्यका हुने सवारी दुर्घटनाको अभिलेखीकरणका लागि महानगरीय ट्राफिक प्रहरी महाशाखाले ‘रेड एक्सिडेन्ट इन्फरमेसन म्यानेजमेन्ट सिस्टम’ प्रयोगमा ल्याएको छ । 

महाशाखा तथा यातायात व्यवस्था विभागको सहकार्यमा महाशाखा लगायत मातहतका ३३ वटा प्रहरी कार्यालयमा एकैसाथ सफ्टवेयर प्रयोगमा ल्याइएको हो । 

महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भीमप्रसाद ढकालका अनुसार सफ्टवेयर सञ्चालनसँगै सम्पूर्ण सवारी दुर्घटनाको रेकर्ड राखिन्छ र अभिलेखीकरण गरिएका तथ्यांकलाई विज्ञ सहितको टीमले तथ्यांक विश्लेषण गरेर दुर्घटनाका कारण, बढी दुर्घटना हुने स्थान, सवारीको अवस्था लगायत अन्य कारणको समेत निर्क्यौल गरी सोको व्यवस्थापनका लागि अल्पकालीन तथा दीर्घकालीन योजना तर्जुमा गरी लागू गर्न टेवा पुग्ने बताए ।

दुर्घटना अभिलेख व्यवस्थापनमा ट्राफिक प्रहरीले पूर्व पनि विभागबाट उपलब्ध गराइएको तालिका प्रयोग गरिँदै आएको जानकारी महाशाखाका प्रवक्ता प्रहरी उपरीक्षक जिवनकुमार श्रेष्ठले दिए ।

उनले भने, ‘हालै मात्र सो कार्यलाई अझ बढी प्रभावकारी बनाई कार्यसम्पादनमा सरलता एवं सहजताको लागि यातायात व्यवस्था विभागबाट दुर्घटना अभिलेखीकरणका लागि महाशाखालाई ३४ थान मोबाइल सेट उपलब्ध गराइएको छ ।’