कर्णाली प्रदेश सरकारले प्रदेश भित्रिने प्रमुख नाका बबईमा आइतवारदेखि ‘कोरोना हेल्थ डेस्क’ स्थापना गरेको छ ।

डेस्कमा वीरेन्द्रनगर भित्रिने व्यक्तिको ज्वरो नाप्ने, १००.४ डिग्रीभन्दा बढी ज्वरो आएका व्यक्तिको फोन नम्बर माग्ने र घर पठाउने गरिएको छ ।

डेस्कमा स्वास्थ्य जाँच तीव्र रुपमा भइरहेको जनस्वास्थ्य सेवा कार्यालय सुर्खेतका प्रमुख चेतननिधि वाग्लेले जनाएका छन् ।

भेरीगंगा नगरपालिका–५ बबईमा आइतवारदेखि हेल्थ डेस्क स्थापना गरी प्रदेश भित्रिने यात्रुको स्वास्थ्य जाँच गर्न शुरू भएको उनले बताए ।

प्रदेश सरकारको स्वास्थ्य निर्देशनालय सुर्खेत र जनस्वास्थ्य सेवा कार्यालयको सहकार्यमा स्वास्थ्य जाँच शुरू भएको हो । स्वास्थ्य निर्देशनालयका निर्देशक रिता भण्डारी जोशीले आइतवार साढे १० बजे शुरू गरेको जाँचमा आइतवार नै १ हजार ८८४ जनाको स्वास्थ्य जाँच गरिएको बताइन् । ‘१ हजार २२० पुरुष, ६६४ महिला गरी जम्मा १ हजार ८८४ जनाको स्वास्थ्य चेकजाँच गरिएको छ,’ उनले भनिन्, ‘सोमवार अपराह्नसम्म ९३८ महिला र १ हजार ६३८ पुरुष गरी २ हजार ५७६ जनाको स्वास्थ्य जाँच गरिएको छ ।’

डेस्कमा जाँच गर्दा १००.४ डिग्रीभन्दा माथि ज्वरो भएका १४ जना फेला परेका थिए । तीमध्ये कोही पनि कोरोना प्रभावित देशबाट नआएकाले फोन नम्बर लिएर घर पठाइएको प्रमुख वाग्लेले बताए ।

‘बबईमा स्वास्थ्य जाँच गर्नका लागि ८ जनाको टोली खटिएको छ । थप स्वास्थ्यकर्मी पठाउने कुरा मन्त्रालयमा भएको छ । बिहान ६ बजेदेखि रातिसम्म हेर्ने काम भइरहेको छ,’ उनले भने, ‘राति जनशक्ति अभावमा स्वास्थ्य जाँच गर्न सकिएको छैन । हाल निर्देशनालय, जनस्वास्थ्य कार्यालय, भेरीगंगा नपाको स्वास्थ्य शाखा लगायतको सहकार्यमा जाँच गरिरहेका छौं ।’

ज्वरो आएका व्यक्तिमा केही समस्या देखिए प्रदेश अस्पताल कालागाउँमा आउन सुझाव दिने गरिएको छ । ‘कोरोना रोगबारे आवश्यक परामर्श दिइरहेका छौं । बबईबाहेक सुर्खेत विमानस्थलमा पनि स्वास्थ्य जाँच गरिरहेका छौं,’ उनले भने । हालसम्म कर्णालीमा शंकास्पद रुपमा कोही पनि नभेटिएको उनले बताए ।

‘केही दिन पहिले १ जनामा आशंका गरी प्रदेश अस्पतालमा निगरानीमा राखेका थियौं । ती व्यक्तिलाई आएको ज्वरो सञ्चो भएर घर फर्किसकेको अवस्था छ,’ उनले भने, ‘अहिले नै कोरोना भाइरसबाट आत्तिनुपर्ने अवस्था छैन । सावधानी अपनाउन भने जरुरी छ ।’