सामसङ इलेक्ट्रोनिक्सले आफ्नो ए सिरिज अन्तर्गत हालै ग्यालेक्सी ए७१ तथा ग्यालेक्सी ए५१ बजारमा प्रस्तुत गरेको छ ।

आफ्नो ए सिरिजमा अर्थपूर्ण आविष्कारका रुपमा यी फोनलाई कम्पनीले लिएको छ ।

ग्यालेक्सी ए७१ र ए५१ मोबाइलमा विभिन्न विशेषता विद्यमान रहेका छन् । आजको व्यस्त जीवनमा अत्यावश्यक ज्यादा टिकाऊ हुने व्याट्री, मानव आँखाले जस्तो देखिन्छ, त्यस्तै फोटो खिच्न सकिने क्यामरा तथा जीवन्त दृश्यावलोकनको लागि इन्फिनिटी–० डिस्प्ले रहेको कम्पनीले जनाएको छ ।

“आफ्नो ग्यालेक्सी ए को पोर्टफोलियोमा ग्यालेक्सी ए७१ र ए५१ लाई समावेश गर्न पाउँदा हामी उत्साहित भएका छौं । विगतका वर्षहरुदेखि नै ग्यालेक्सी ए सिरिज मोबाइल आम प्रयोगकर्तामाझ लोकप्रिय बन्दै आइरहेको छ । हालै प्रस्तुत गरिएका यी दुई ग्यालेक्सी ए७१ र ए५१ मा प्रयोग भएको प्रविधिलाई प्रयोगकर्ताहरूले मन पराउनुहुनेछ,’ सामसङ मोबाइल बिजिनेस हेड प्रणय रत्न स्थापितले भने, ‘आम ग्राहकहरूको चाहना चिटिक्क परेको, लामो समयसम्म टिकाऊ हुने ब्याट्री तथा हरेक क्षणलाई कैद गर्न सकिने क्यामरा भएको डिभाइस नै हो भन्ने हामीलाई थाहा छ, जुन सामसङको ग्यालेक्सी ए डिभाइसमा रहेको छ ।’

ग्यालेक्सी ए७१ र ए५१ मा जीवनका अविस्मरणीय क्षणलाई सहजै कैद गर्नको लागि उत्कृष्ट क्यामरा राखिएको छ । मेन क्यामरा, अल्ट्रावाइड, माइक्रो तथा डेप्थ क्यामरा विशेष सुविधा रहेका छन् । क्यामरामा भएका विशेषताले गर्दा ग्यालेक्सी ए७१ र ए५१ मार्फत् उत्कृष्ट एवं जीवन्त फोटो खिच्न सकिने जनाइएको छ ।