नेपाली भूमि समावेश गरेर भारतले जारी गरेको नयाँ नक्शा सच्याउन र कालापानी क्षेत्रबाट भारतीय सेना फिर्ता गर्न माग गरिएको संकल्प प्रस्ताव संसद्को कार्यसूचीबाट हटाइएकोमा राप्रपाका सांसद राजेन्द्र लिङदेनले आपत्ति जनाएका छन् ।

‘विपक्षी दलले ल्याउन नसकेको प्रस्ताव सत्ता पक्षका सांसदबाट आयो, समर्थन गरौं भनेर आएको संकल्प प्रस्ताव कार्यसूचीबाट फिर्ता भएछ,’ सांसद लिङदेनले बिहीवार प्रतिनिधि सभा बैठकको विशेष समयमा भने । 

भारतले नेपाली भूमि मिचेर नक्शा जारी गरेको ५ महिनासम्म सरकार नबोलेको प्रति उनले आगत्ति जनाए ।

‘भारतले नयाँ नक्शा जारी गरेपछि सर्वदलीय बैठक र संसदीय समितिले तत्काल सरकारले भारत सरकारसँग कुरा गरोस् र सीमाको सुरक्षा गरोस् भन्ने निर्णय गरेको थियो । ५ महिना पुग्न लाग्दा सरकार के गरिरहेको छ ?’ उनले भने, ‘सबै तथ्य र प्रमाणले लिम्पियाधुरा र लिपुलेक नेपालको हो भन्ने पुष्टि गरेको अवस्थामा के एउटा कूटनीतिक नोट पठाउँदैमा नेपाली भूमिमाथिको अतिक्रमण रोकिएला ?’

सांसद् लिङदेनले उपप्रधान एवं रक्षामन्त्री ईश्वर पोखरेलले केहीसमय पहिले कालापानी क्षेत्रको हवाई निरीक्षण गरेकोबारे सदनलाई जानकारी गराउन माग गरे । ‘रक्षामन्त्री केही समय पहिले हेलिकप्टरमा उड्नुभएको थियो, त्यहाँको अवस्था के छ भनेर सदनलाई जानकारी गराउनुपर्दैन ?’ उनले प्रश्न गरे ।

सांसद लिङदेनले कहाँ–कहाँ सीमा मिचिएको छ भन्नेबारे छानबिन समिति गठन र नयाँ–नयाँ नक्शा जारी गर्न सरकारसँग माग गरे । 

‘भूमिसुधार मन्त्रीले साइत आएपछि नक्शा प्रकाशित गर्ने भन्ने हचुवा कुरा नहोस्,’ उनले भनोस् ।