सांसदहरूले नेपालको पूँजीबजारलाई सीमित व्यक्तिको सिन्डिकेटबाट मुक्त गरेर व्यवस्थित गर्न माग गरेका छन् ।

धितोपत्रसम्बन्धी पहिलो संशोधन विधेयक, २०७६ माथि बिहीवार प्रतिनिधि सभाको बैठकमा भएको सैद्धान्तिक छलफलमा सांसदहरूले पूँजीबजारलाई व्यवस्थित गर्न माग गरेका हुन् । 

नेकपा सांसद एवं पूर्व कानूनमन्त्री शेरबहादुर तामाङले पूँजीबजारको कारोवारलाई आम जनताको पहुँचमा पुर्‍याउन माग गरे ।

शेयर बजारमा ५० जना ब्रोकरको एकाधिकार रहेको र उनीहरूले जता लैजन चाह्यो उतै लैजाने गरेको भन्दै यसमा नियमन जरुरी रहेको उनको भनाइ थियो ।

तामाङले शेयर दलालको सट्टा शेयर कारोबारी भन्न प्रस्ताव समेत गरे । 

नेपाली कांग्रेसका सांसद एवं पूर्व अर्थमन्त्री ज्ञानेन्द्रबहादुर कार्कीले पूँजीबजारमा समनानुकूल सुधार जरुरी रहेको बताए । 

कांग्रेस सांसद राजेन्द्र केसीले पूँजीबजारमार्फत पूँजी परिचालन गर्नुपर्ने बताए । ‘पूँजीबजार अर्थमन्त्रीको छायाँसँग तर्सेको जस्तो देखिन्छ । अर्थमन्त्री जाने कुराले शेयर बजारमा उत्साह र अर्थमन्त्री रहने कुराले गिरावट आउने गरेको छ ।

अर्थमन्त्रीसँग किन शेयर बजार किन तर्सेको होला ?’ उनले प्रश्न गरे । 

नेमकिपाका प्रेम सुवालले समाजवादको गफ गरिरहेको सरकारले संविधानविपरीत पूँजीबजारको कानून ल्याउन नमिल्ने भन्दै विधेयक फिर्ता गर्न माग गरे । ‘कोठामा बसेर कारोवार गरेर उत्पादन हुन्छ ? तपाईं मुठ्ठीभर व्यक्तिको अर्थमन्त्री हो कि जनताको ? इञ्जिनीयर पनि, शिक्षक पनि, कर्मचारी पनि शेयर बजारमा कारोबार गर्ने ? यो मिल्दैन विधेयक फिर्ता गर्नुस्,’ सुवालले भने । 

पूँजीबजार पूँजीपतिको मात्र होइन: मन्त्री खतिवडा

सांसदको प्रश्नको जवाफ दिँदै अर्थमन्त्री डा. युवराज खतिवडाले पूँजीबजार पूँजीपतिका लागि मात्र नभई १५ लाखभन्दा बढी जनता जोडिएको बताए ।

आफैंले उद्योग खोल्न नसक्ने, तर जोखिम मोल्न सक्ने साना तथा मझौला वचतकर्ताले शेयर बजारमा लगानी गरिरहेको उनले बताए । 

जलविद्युत्मा हजारौंको शेयरमार्फत सहभागिता हुँदै आएको र लघुवित्तबाट ऋण लिएर पनि शेयर किन्ने गरिएको उनले बताए  ।

बजारलाई व्यवस्थित गर्नका लागि सरकारले विधेयक ल्याएको मन्त्री खतिवडाले बताए ।

‘शेयर बजारको उतारचढावबारे म यति भन्छु, कम्पनीको वित्तीय अवस्था र भावी वित्तीय योजना तथा सरकारले कस्तो नीति बनाउँछ भनेर लगानीकर्ताले निर्धारण गर्नुपर्छ,’ उनले भने, ‘व्यक्ति विशेष जो आएपनि विधि र नीतिअनुसार हुन्छ । कोरोनाको कारण विश्वव्यापी रूपमा आएको असरका कराण शेयर बजारमा उथलपुथल देखिएको छ, अल्पकालीन अवस्थालाई हेरेर दीर्घकाललाई असर गर्नुहुँदैन ।’