कोभिड–१९ भनिने कोरोनाभाइरसको खोप विकसित गर्ने अन्तिम चरणमा आफूहरू पुगेको इजरायलका वैज्ञानिकहरूले बताएका छन् । त्यसको घोषणा अब केही दिनमा गरिने अपेक्षा छ । 

इजरायली दैनिक पत्रिका हारेजले स्वास्थ्य स्रोतहरूलाई उद्धृत गर्दै बिहीवार छापेअनुसार इजरायलको इन्स्टिच्युट फर बायोलोजिकल रिसर्चले भाइरसको जैविक संरचना र गुणहरूको बारेमा उल्लेख्य जानकारी हासिल गरिसकिएको जनाएको छ ।

त्यसपछि उनीहरूले भाइरस लागिसकेकाहरूमा एन्टीबडीको उत्पादन गर्ने र खोप विकसित गर्ने विषयमा पनि अध्ययनमा सफलता पाएको बताए । 

तर खोप विकसित गर्नका लागि अनेकौं परीक्षणहरू अझै बाँकी छन् । खोपलाई प्रभावकारी वा सुरक्षित मानिनका लागि अझै परीक्षण गर्नुपर्छ, समाचारमा उल्लेख गरिएको छ । 

तर इजरायलको रक्षा मन्त्रालयले यसको पुष्टि गरिसकेको छैन ।

इन्स्टिच्युट फर बायोलोजिकल रिसर्च इजरायली शहर नेस तजियोनामा छ । सन् १९५२ मा यसलाई इजरायल डिफेन्स फोर्सेस सायन्सेज कोर्सको एक अंगका रूपमा स्थापना गरिएको थियो । त्यो पछि गएर नागरिक संस्था बन्यो । 

यो प्राविधिक रूपमा प्रधानमन्त्रीको कार्यालयको सुपरीवेक्षणमा रहन्छ तर रक्षा मन्त्रालयसँग नियमित सम्पर्कमा रहन्छ, समाचारमा उल्लेख गरिएको छ ।

अहिलेसम्म कोरोनाभाइरसको औषधी पत्ता लाग्न नसकेको विश्व स्वास्थ्य संगठनले बताएको छ ।