प्रदेश नम्बर २ को नामका सम्बन्धमा नेपाली कांग्रेसका एक सांसदले राखेको बागी प्रस्तावमा कांग्रेस र नेकपाले राखेका मूल प्रस्तावमा भन्दा धेरै मत परेको छ ।

प्रदेश सभामा मंगलवार कांग्रेस सांसद राजेश्वरप्रसाद शाहले छुट्टै प्रस्ताव राखेका थिए । उनको प्रस्तावमा ४२ मत पर्‍यो ।

नेपाली कांग्रेसको मूल प्रस्तावमा २८ र नेकपाको प्रस्तावमा ३७ मत परेको थियो ।

राजेश्वरप्रसाद शाहले शंकर चौधरी, ओमप्रकाश शर्मा, आशिया देवीलगायतको समर्थनमा मध्यमधेशको प्रस्ताव दर्ता गरेका थिए ।  

त्यसअघि कांग्रेसले राखेको मिथिला भोजपुरा र नेकपाले राखेको जानकी प्रदेश राख्ने प्रस्ताव प्रदेश सभाबाट अस्वीकृत भएको थियो । 

राजधानी र नाम तोक्न प्रदेश सभाको दुईतिहाइ अर्थात ७२ मत आवश्यक छ । प्रदेश २ को प्रदेश सभामा १ सय ७ जना सांसद छन् । सत्तारुढ समाजवादी पार्टी र राजपासँग बहुमत भएपनि आवश्यक दुईतिहाइ छैन । 

प्रदेशको नाम राख्ने विभिन्न प्रस्तावमा मतदान चलिरहेको छ । 

कुनैपनि प्रस्तावमा दुईतिहाइ आउन नसकेर मतदान दोस्रो चरणमा धकेलिने सम्भावना बढेको छ ।