प्रदेश नम्बर २ को नाम मधेश राख्ने प्रस्ताव अस्वीकृत भएको छ ।

प्रदेश २ मा गठबन्धन सरकार बनाएका राष्ट्रिय जनता पार्टी र समाजवादी पार्टीका नेताहरूले अघि सारेको ‘मधेश’ प्रदेशलाई प्रदेश सभाका सदस्यहरूले अस्वीकार गरेका हुन् ।

समाजवादी पार्टीका प्रमुख सचेतक शैलेन्द्र कुमार यादवले प्रदेशको नाम मधेश प्रदेश कायम हुनुपर्ने प्रस्ताव पेश गरेका थिए । उनको प्रस्तावलाई सभामुख सरोजकुमार यादवले निर्णयार्थ प्रस्तुत गरेका हुन् ।

सरकारमा रहेका दुवै दल राजपा र समाजवादीले प्रस्ताव गरेको मधेश प्रदेशको पक्षमा जम्मा ६० मत आएको हो ।

प्रदेश सभामा समाजवादीको ३० र राजपाको २५ गरी ५५ भएपनि प्रस्तावका पक्षमा थप ५ मत आएको थियो ।

प्रदेश नामाकरणका लागि आवश्यक पर्ने ७२ मतमा १२ मत कम भएपछि सो प्रस्ताव अस्वीकृत भएको हो ।

मधेश प्रदेशको विपक्षमा ४६ मत परेको थियो भने १ मत बदर भएको थियो ।