भारतसँग जोडिएका सीमा नाकाहरु बन्द गर्नमा प्रदेश सरकार अलमल रहेको बेला कैलालीको कैलारी गाउँपालिकाले चन्दनचौकी सीमा नाका पूर्णरुपमा बन्द गरेको छ ।

सो गाउँपालिका र भारतको चन्दनचौकी बजारसँग जोडिएको सो नाका बन्द गरेको गाउँपालिकाका प्रवक्ता कमलप्रसाद चौधरीले जानकारी दिए ।

सो नाका भएर कैलारी गाउँपालिका, गौरीगगा नगरपालिकालगायतका स्थानीयहरु किनमेल गर्न चन्दनचौकी, पलियालगायत भारतीय बजार जाने गर्दछन् ।

भारतीयहरु पनि ओहोरदोहोर गर्ने भएकोले कोरोना भाइरस संक्रमणको जोखिमलाई मध्यनजर गरेर बन्द गरेको उनले बताए ।

नाकामा किनमेलका लागि भारत जान पूर्ण रुपमा बन्द गरिएको भएपनि भारतबाट फर्केका नेपालीहरुलाई भने चेकजाँच पश्चात आवश्यक काउन्सिलिंगपछि मात्रै आउन दिइरहेको उनको भनाइ छ ।

त्यस्तै उनले गाउँपालिकासँग जोडिएका अन्य साना नाका पनि बन्द गरेको बताएको छ । ‘हामीले उताबाट भारतीय नागरिकलाई आउन दिएका छैनौं । यो नाकाबाट जोडिएका मिलनपुर, विपतपुर मुक्त कमैया शिविर, भुइयाँफाँटा, रामपुर, मोहनपुर, शिवरत्नापुर, बड्का पलिया लगायत गाउँहरुमा भोलेन्टिएर टीम परिचालन गरेका छौं’, प्रवक्ता चौधरीले भने ।

कोरोनाविरुद्ध गाउँपालिकाले विपद् व्यवस्थापन समितिको बैठक बोलाएर सीमा सुरक्षा बल (बीओपी), ईलाका प्रहरी कार्यालय, गाउँका भल्मन्साहरु, स्वयमसेविका, सम्बन्धित वडाका वडा सदस्यहरुलाई परिचालन गरेको बताइएको छ । कोरोना संक्रमण जोखिम विरुद्ध समिति गठन गरेर नै सीमा नाकामा २४ औं घण्टा हेल्प डेक्स राख्ने समेत गरेको जनाइएको छ ।