सरकारले कारगारभित्र कोरोना (कोभिड–१९) भाइरसको संक्रमणको जोखिम कम गर्न कैदीबन्दीहरुको सजाय घटाउने विकल्प सारे संगै कारागारमा भेटघाट कार्यलाई बन्द गरेको छ ।

कारागार व्यवस्थापन विभागले शुक्रवार नै सबै जिल्ला कारागार कार्यालयलाई परिपत्र गर्दै अनिश्चितकालको लागि भेटघाटमा रोक लगाएको जनाइएको छ ।

कारागारभित्रको भीडभाडको कारण कोराना संक्रमण बढ्न सक्ने भन्दै संक्रमण रोक्ने रणनीतिका साथ भेटघाटमा रोक लगाएको कारागार व्यवस्थापन विभागका सूचना अधिकारी देवर्षि सापकोटाले जानकारी दिए । मुलुकका विभिन्न कारागारमा हाल करिब २५ हजार कैदीबन्दीले विभिन्न कसुरमा कैद भुक्तान गरिरहेका छन् । 

कारागार विभागले शुक्रबारदेखि नै भेटघाटमा रोक लगाउन परिपत्र गरेपनि कैलाली कारागारले शनिबारदेखि भेटघाटमा रोक लगाएको छ । जिल्ला कारागार प्रमुख महेन्द्र खड्काले शनिबारदेखि रोक लगाएको जानकारी दिए । कैलाली कारागारको क्षमता १५० जना कैदीबन्दी राख्न सकिने क्षमता रहेको छ । तर यहाँ स्वादेशी र विदेशी गरी ४५७ जना कैदीबन्दी रहेका छन् ।

सरकारले कैदीबन्दीहरुको सजाय घटाउन विकल्प लिएको भएपनि तयारीवारे भने कुनै जानकारी नआएको कारागार व्यवस्थापन विभागले जनाएको छ । कैदीबन्दीहरुलाई ठूलो संख्यामा एकै ठाउँ राख्दा कोरोना संक्रमण हुनसक्ने भन्दै सरकारले कैदीहरुलाई महामारीबाट जोगाउन कारागारमा उनीहरुको संख्या घटाउने विकल्प अघि सारेको थियो ।

सरकारले ६५ वर्षमाथिका र सामान्य अपराधमा कारागारमा रहेका कैदीलाई प्रक्रिया मिलाएर छाड्ने जनाएको थियो । यद्यपी त्यसवारे कुनै आधिकारिक जानकारी नआएको विभागका सूचना अअधिकारी सापकोटाको भनाइ छ  ।