छिमेकी मुलुक भारतमा कोरोनाभाइरसका केसहरू बढिरहँदा नेपालमा पनि चिन्ताको स्थिति देखिएको छ । 

भारतमा जनता कर्फ्यु चल्दै गर्दा आधा जति भागमा लकडाउन गरिएको छ । अर्थात् अत्यावश्यक सेवा बाहेक सबै कुरा बन्द गरिएका छन् । 

प्रश्न उठ्छ, लकडाउन मात्रले कोरोनभाइरससँग लड्न सकिन्छ त ?

विश्व स्वास्थ्य संगठनको कुरा सुन्ने हो भने कोरोनाभाइरस रोक्नका लागि लकडाउन मात्र पर्याप्त छैन । यस ज्यानमारा भाइरसलाई परास्त गर्न अन्य मुलुकले लकडाउन बाहेक अन्य के काम गरे भन्ने जान्नु जरूरी छ । 

चीनपछि दक्षिण कोरियामा कोरोना संक्रमणको केस ह्वात्तै बढेको थियो तर उसले त्यति नै तीव्र गतिमा कोरोनाभाइरसको परीक्षण किट बनायो । लगभग तीन लाख मानिसको परीक्षण गरियो । अहिले पनि त्यहाँ दिनदिनै लगभग १० हजार मानिसलाई सित्तैमा परीक्षण गरिँदैछ । 

दक्षिण कोरियाले टेस्ट किटको व्यापक उत्पादन पपनि शुरू गरेको छ । 

सिंगापुरमा सीसीटीभीको सहायता लिएर ६ हजारजनालाई ट्रेस गरिएको छ । ती व्यक्तिहरू संक्रमित व्यक्तिको सम्पर्कमा हुन सक्ने आशंका थियो । 

सिंगापुरमा जसलाई आइसोलेसनमा बस्न भनिएको छ, तिनलाई दिनमा धेरैपटक सम्पर्क गरेर फोटो मगाइन्छ । यसबाट उनीहरू कहाँ छन् भन्ने थाहा हुन्छ । आइतवारसम्म सिंगापुरमा कोरोनाको ४३२ केस आएका छन् र दुईजनाको मृत्यु भएको छ । 

उता हङकङमा कुनै संक्रमित व्यक्तिमा लक्षण देखिनुभन्दा दुई दिन अघिसम्म उसको सम्पर्कमा रहेका व्यक्तिलाई पनि ट्रेस गरिने गरेको छ । हङकङमा विदेशबाट आएका व्यक्तिले हातमा विद्युतीय ब्रासलेट लगाउनुपर्ने हुन्छ र त्यसले उनीहरूको गतिविधि ट्य्राक गर्छ । 

संसारभरि कोरोनाभाइरसका जति पनि केस आएका छन्, ती विदेशयात्रा गरेका मानिसमा पहिला देखिएको हो । 

एकातर्फ केही देशले कोरोनाभाइरसविरुद्ध समयमै सतर्कता अपनाए भने अमेरिका जस्ता देश चाहिँ पछि परे । अमेरिकामा परीक्षण नै निकै ढिलो गरियो । निजी प्रयोगशालामा गरिएका परीक्षणलाई स्वीकृति दिन ढिलाइ गरियो ।

धेरै मानिसले महंगो परीक्षण नै गराउन सकेनन् । अमेरिकामा आइतवारसम्म कोरोनाको १५ हजारभन्दा बढी केस देखिएका छन् र २०० भन्दा बढीको मृत्यु भइसकेको छ । 

कोरोनाबाट बच्नका लागि लकडाउन मात्र पर्याप्त छैन, परीक्षण गर्नु पनि जरूरी छ । अनि विदेशबाट आएका प्रत्येक व्यक्तिको पहिचान गर्नुपर्छ । कोरोना संक्रमित वा कोरोनाको आशंका गरिएका व्यक्तिको सम्पर्कमा आएका सबैलाई पहिचान गर्नुपर्छ ।