यसरी जित्यो चीनले कोरोनाभाइरसविरुद्धको लडाइँ

केही हप्ता अघिसम्म कोभिड–१९ का रोगीहरूले भरिभराउ चिनियाँ अस्पतालहरूमा अहिले खाली शय्या देखिन्छन् । कतिपय अस्थायी अस्पतालहरू बन्द गरिएका छन् । 

कोरोनाभाइरसको उद्गमविन्दु वुहान शहरमा अब बन्दाबन्दी (लकडाउन) हटाउने तयारी गरिँदैछ । वुहान रहेको हुबेई प्रान्तमा त आवागमन खुला गरिसकिएको छ । 


Advertisement

स्थानीयहरूलाई संक्रमण नभएको लगातार एक हप्ता भइसकेको छ । अहिले देखिएका संक्रमणहरू बाहिरबाट आएका मानिसले ल्याएका हुन् । 

आफ्नो देशमा संक्रमण रोकिएपछि अहिले चीनले आफ्ना स्वास्थ्यकर्मीहरूलाई युरोपका देशमा पठाएर कोरोनाभाइरस रोक्नका लागि खटाइरहेको छ । 


Advertisement

विश्व स्वास्थ्य संगठन र चिनियाँ सरकारले १३ जना विदेशीहरूलाई चीनका पाँचवटा शहरको भ्रमण गराएर कोभिड–१९ महाव्याधिको स्थिति र त्यसलाई जित्न चीनले गरेको प्रयासका बारेमा जानकारी दिएको थियो । लगभग एक महिनाअघि गरिएको उक्त भ्रमणमा १२ जना चिनियाँ वैज्ञानिक पनि समावेश थिए । 

भ्रमणपछि विदेशी वैज्ञानिकहरू चीनको कामकारवाही देखेर छक्क परे । उक्त भ्रमणको प्रतिवेदनमा लेखिएको छ, ‘यो महाव्याधि फैलिनबाट रोक्नका लागि चीनले अपनाएको बहादुरीपूर्ण उपायले चीनमा साँच्चिकै भाइरस संक्रमणमा कमी आएको छ ।’

चीनको सफलताबाट विश्वले पनि पाठ सिक्न सक्छ । तर चीनको निरंकुश व्यवस्थाले व्यापक मात्रामा बन्दाबन्दी गरेर अनि कठोर निगरानी गरेर भाइरस संक्रमण रोक्नका लागि सफलता पाएको कुरा अन्य देशको हकमा लागू हुन्छ हुँदैन भन्ने प्रश्न पनि आफ्नै ठाउँमा छ । ‘यस क्षेत्रमा लामो समय बिताएको मान्छे हुनुको नाताले मलाई सोध्न मन लाग्छ– त्यस्तो कठोर उपाय अपनाएर पनि भाइरस फैलिनबाट रोक्न सकिँदो रहेछ त ? तर चीनमा लाखौं मानिसलाई भाइरसको संक्रमण नहुनुमा यही आक्रामक उपाय नै जिम्मेवार छ,’ क्यानडाका संक्रामक रोग विशेषज्ञ ब्रुस एलवार्डले बताए । उनी पनि भ्रमण टोलीमा थिए ।

वुहान शहरलाई पूरै बन्दाबन्दी गरियो र त्यस वरपरका अन्य शहरमा बस्ने ५ करोड मानिसलाई अनिवार्य क्वारेन्टाइनमा राखियो । त्यसले गर्दा संक्रमित व्यक्तिहरू देशका अन्य भागमा जान पाएनन् । चीनका अन्य क्षेत्रमा मानिसहरू स्वेच्छाले क्वारेन्टाइनमा बसे अनि उनीहरूलाई टोलछिमेकका नेताहरूले निगरानी समेत गरे । 

चिनियाँहरूले वुहानमा कोरोनाभाइरसको उपचारकै लागि भनेर दुईवटा अस्पताल जम्मा एक हप्तामा बनाए । चीनभरिका स्वास्थ्यकर्मीलाई वुहान पठाइयो । सरकारले कोरोना पुष्टि भएका मानिसको सम्पर्कमा आउने सबैलाई पत्ता लगाउन अभूतपूर्व प्रयास गर्‍यो । वुहानमा मात्र पाँच वा बढी मानिसका १८ सय भन्दा बढी समूहले दशौं हजार मानिसलाई पत्ता लगाए । 

आक्रामक रूपमा सामाजिक दूरी देशभरि अपनाइयो । सबै सार्वजनिक स्थानहरू बन्द गरिए । चिनियाँ नववर्षमा बन्द भएका विद्यालयहरूको बिदा अवधि बढाइयो । पसलहरू सबै बन्द गरिए । बाहिर निस्कने मानिसले मास्क लगाउन अनिवार्य गरियो । 

चीनमा व्यापक प्रयोग गरिने दुई मोबाइल यापहरू अलीपे र वीच्याटले पनि नियन्त्रण कायम गर्न सहायता गरे । मानिसहरूको आवागमनको हिसाब राख्न ती यापले सहायता गरे । संक्रमण प्रमाणित भएका मानिसलाई अन्त जान नदिनका लागि पनि यापबाट सहयोग पुग्यो । अनि मोबाइल फोनहरूमा रंगका कोडहरू दिएर कुन मान्छेको स्वास्थ्य स्थिति के छ भन्ने थाहा पाउने बनाइयो । हरियो रंगको कोड हुनेलाई मात्र हिँड्न दिइयो । 

चीनले कोरोनामाथि पाएको सफलताले अन्य देशलाई पनि आत्मविश्वास दिलाएको छ । नयाँ नयाँ क्षेत्रमा संक्रमण फैलिएको भनी दिनदिनै खबर आइरहेको भए पनि व्यावहारिक उपाय अपनाउँदा यसलाई जित्न सकिने रहेछ भनी चीनले सिकाएको छ । 
 

सायन्स म्यागेजिनबाट

एजेन्सी
एजेन्सी

लेखकबाट थप...

कमेन्ट गर्नुहोस्