कोरोना भाइरस संक्रमणको सम्भावित जोखिमलाई रोकथाम गर्न देशव्यापी ‘लक–डाउन’ जारी भएको मौका छोपि धनुषामा आलु र प्याजको कालोबजारी गर्ने ३ व्यापारी पक्राउ परेका छन् । 

जिल्ला प्रहरी कार्यालय धनुषाबाट बजार अनुगमनका लागि खटिएका प्रहरी टोलीले जनकपुरधामको विभिन्न स्थानबाट कालोबजारी गर्ने व्यापारीलाई पक्राउ गरेको हो । 

पक्राउ पर्नेमा जनकपुरधाम उपमहानगरपालिका वडा नम्बर ४ कदम चोकका ४८ वर्षीय प्रदीप अग्रवाल, वडा नम्बर ४ महावीर चोकका २० वर्षीय अंकित साह र वडा नम्बर ४ महावीर चोकका विकासकुमार साह रहेका प्रहरीले जनाएको छ ।

पक्राउ पर्ने व्यापारीले आलु प्रतिकेजी ५० रुपैयाँ र प्याज प्रतिकेजी १०० रुपैयाँमा बिक्री गरिरहेको जनाइएको छ ।

पक्राउ गरिएकाको थप अनुसन्धान जारी रहेको बताइएको छ ।