घरमै ताजा तरकारी

कोडिभ–१९ का कारण सरकारले घोषणा गरेको लकडाउनलाई पूर्णपालना गरेर घरमा बस्नेहरुलाई झापाको अर्जुनधाराको मामा–भाञ्जा सिर्जनशील कृषि फार्मले घरघरैमा ताजा तरकारी पुर्‍याउने व्यवस्था गरेको छ ।
 
अर्जुनधारा ५, ८, ११ र मेचीनगर १३ मा २० बिघा जमिनमा सो कृषिफार्मले काक्रा, करेला, बोडी, बैगुन, टमाटरलगायतका तरकारी खेती गरेको छ । फार्मबाट उत्पादित ताजा तरकारी प्याकेजिङ गरेर स्थानीयको मागअनुसार घरमै पुर्‍याउन थालेको फार्मका सञ्चालक निर्मल अधिकारीले बताए ।

उनले जिल्ला प्रशासन कार्यालयबाट सवारी अनुमति (पास) लिएको गाडीमा तरकारी राखेर आजदेखि घरघरै पुर्‍याउन थालिएको र तरकारीको मूल्य प्रचलित बजारभाउभन्दा सस्तो रहेको जानकारी दिए।
 
उनी भन्छन्,'कोभिड–१९ को सङ्क्रमणको जोखिमको ख्याल नगरी सर्वसाधारणहरु तरकारी पसलमा भीड लागेको देखेर सङ्कटको बेला सहयोग गर्ने उद्देश्यले आफूहरुले घरघरमा तरकारी डेलिभरी सेवाको व्यवस्था गरेका हौँ ।'


Advertisement

उहाँका अनुसार काक्राको मूल्य प्रतिकेजी रु ५०, टमाटरको रु ५०, बैगुनको रु ५०, बोडी र करेलाको मूल्य भने प्रतिकेजी रु २०० कायम गरिएको छ । कृषि ज्ञान केन्द्र इलामका प्रमुख शालिकराम भट्टराईले घरघरमा तरकारी पुर्‍याउने कार्य अहिलेको अवस्थामा अति आवश्यकीय र सुरक्षित भएको सामाजिक सञ्जालमा प्रतिक्रिया व्यक्त गरेका छन् । फार्म सञ्चालकहरुले आफ्नो फोन नम्बर सामाजिक सञ्जालमार्फत सम्पर्कका लागि सार्वजनिक गरेपछि प्रशस्त माग आइरहेको अधिकारीले बताए।
 
“पहिलो प्राथमिकता अर्जुनधारा नगरभित्रकाका लागि हो”, उहाँले भन्नुभयो, “अन्य छिमेकी नगरबाट समेत फोन आइरहेको छ । उनीहरुलाई पनि यस्तो सङ्कटका बेला सेवाचाहिँ दिने हो कि भन्ने सोच बनाइरहेका छौँ ।” स्थानीय पत्रकार दिपीन राईले बजारको भीडभाडमा जाने अवस्था नरहेको अवस्थामा घरघरैमा बजार मूल्यमै ताजा तरकारी पुर्‍याएर सेवा दिने अभियानलाई स्थानीय सरकारहरुले प्रोत्साहित गर्नुपर्ने बताए।
 


Advertisement

कमेन्ट गर्नुहोस्