कोरोना भाइरसको जोखिम बढेसँगै ५ नम्बर प्रदेशमा धमाधम क्वारेन्टाइन बनिरहेका छन् । स्थानीय र प्रदेश सरकारले क्वारेन्टाइन बनाउने प्रतिस्पर्धा जस्तै गरेको छ ।

प्रदेशका अधिकांश स्थानीय तहले १५ देखि ५० शय्याको क्वारेन्टाइन बनाएका छन् तर क्वारेन्टाइनमा चिकित्सकीय सेवासुविधा पुर्‍याउन र आइसोलेसन बनाउनेतर्फ खासै ध्यान दिइएको छैन ।

ठूलो संख्यामा कोरोना संक्रमित भटिएमा व्यवस्थापन थाम्न प्रदेशलाई गाह्रो पर्ने देखिन्छ तर मुख्यमन्त्री शंकर पोखरेलले विपद्को सामना गर्न सक्ने गरी प्रदेशको तयारीमा जुटेको बताएका छन् ।

प्रदेश जनस्वास्थ्य प्रयोगशालाका प्रमुख डा. राजेन्द्रकुमार गिरीले प्रदेशमा पूर्व तयारी बढेको दाबी गरे । डा. गिरीले भने, ‘भारतमा जस्तै ह्वात्तै कोरोनाका बिरामी बढे भने त हामीले थेग्न सकिँदैन तर आइसोलेसनबाट आईसीयू सहितको शय्यामा बिरामी लैजानुपर्ने अवस्था आए हामी कहाँ भेन्टिलेटरदेखि अक्सिजनको समस्या पर्नेछ । जो हामीकहाँ अत्यन्त कम छन् ।’ 

सुखद कुरा ५ नम्बर प्रदेशबाट हालसम्म शंकास्पद २३ जना बिरामीको स्वाब परीक्षणका लागि काठमाडौं पठाइएकोमा सबै बिरामीको ‘नेगेटिभ’ नतिजा आएको छ । प्रदेशका विभिन्न अस्पतालमा अहिले १३ जना बिरामीको आइसोलेसनमा राखेर उपचार भइरहेको छ । 

लुम्बिनी प्रादेशिक अस्पताल बुटवलका कोरोना भाइरस रोगका फोकल पर्सन डा. सुदर्शन थापाले चिकित्सकका लागि आवश्यक सामग्री विना काम गर्न बाध्य भएको बताए । उनले डाक्टर र नर्सलाई चाहिने व्यक्तिगत सुरक्षा उपकरण (पीपीई) पनि छैन । डाक्टरहरू सुरक्षित उपचारका लागि चाहिने उपकरण र तयारी नहुँदा जोखिम मोलेरै काम गर्न बाध्य भएको गुनासो गरे । 

४ अस्पताललाई कोरोना विशेष अस्पताल

बिहीवारसम्म प्रदेशका विभिन्न ४ वटा अस्पतालमा १४० वटा आइसोलेसन शय्या प्रदेश सरकारले तयार पारेको छ । बुटवलको धागो कारखानास्थित कोरोना विशेष अस्पतालमा ५० शय्या, भैरहवास्थित भीम अस्पतालमा ३०, दाङको बेलझुण्डीमा ३० र बाँकेमा ३० वटा शय्या तयारी अवस्थामा रहेका सामाजिक विकास मन्त्रालयका अस्पताल विकास तथा चिकित्सा महाशाखा प्रमुख डा. उमाशंकर प्रसाद चौधरीले जानकारी दिए । ४ वटा अस्पतालका लागि आवश्यक तयारी गर्न र उपकरण खरिदका लागि प्रदेश सरकारले २/२ करोड रुपैयाँ उपलब्ध गराएको छ ।

चौधरीले भने, ‘हाम्रो तयारी तीब्र छ । आइसोलेसन अस्पतालमा पनि आवश्यकता अनुसार शय्या थप्न सकिन्छ । यी अस्पतालका लागि आईसीयू र भेन्टिलेटर ल्याउने क्रममा छौं । हामी सचेत र तीब्र तयारीमा छौं ।’ 

१० करोडको कोरोना भाइरस नियन्त्रण कोष

प्रदेश सरकारले कोरोना भाइरस नियन्त्रण कोष स्थापना गरेको छ । कोषमा प्रदेश सरकारको तर्फबाट १० करोड रुपैयाँ जम्मा भएको छ । त्यसैगरी कोषमा मुख्यमन्त्री र मन्त्रीहरूले १ महिनाको तलब जम्मा गर्नेछन् । कोरोना भाइरस नियन्त्रण, प्रतिकार्य र रोकथामका लागि आइसोलेसन अस्पताल निर्माण, सञ्चालन र व्यवस्थापन गर्न मन्त्रीहरू संयोजक रहेको व्यवस्थापन समिति गठन गरिएको छ । कोषमा संघसंस्था र सर्वसाधारणले पनि रकम जम्मा गर्न सक्नेछन् ।

राहत प्याकेज घोषणा गर्न माग

प्रदेशसभा सदस्य बैजनाथ जयसवालले  कोरोना संक्रमणले निम्न वर्गीय सर्वसाधारण मारमा परेको जनाउँदै तत्काल राहतको प्याकेज ल्याउन प्रदेश ५ सरकारसँगै संघीय सरकारसँग माग गरेका छन् । संक्रमणबाट बच्न सरकारले लक–डाउन गरेसँगै त्यसको प्रत्यक्ष मार दैनिक काम गरेर खाने निम्न वर्गीय सर्वसाधारणमा परेको जनाउँदै उनीहरूका लागि खाद्यान्न सहितको राहत प्याकेज ल्याउनुपर्ने बताए ।  

संक्रमणबाट बाँच्न सरकारले गरेको आह्वानलाई पालना गर्नु सबैको दायित्व भएको जनाउँदै यस्तो विषम परिस्थिति सर्वसाधारणले पनि सजग र संयमता अपनाउनुको विकल्प नरहेको उनले बताए । लक–डाउनले उद्योग कलकारखानामा कार्यरत दैनिक ज्यालादारीका मजदुरहरू कामविहीन बन्न पुगेका छन् । दैनिक काम गरेर जीविकोपार्जन गर्ने सर्वसाधारणलाई दिनचर्यामा समस्या उत्पन्न भएको छ ।

‘जनतालाई भोकै रहन दिँदैनौं’

मुख्यमन्त्री पोखरेलले लक–डाउन लम्बिएपनि प्रदेशबासी जनतालाई भोकै मर्न नदिने बताएका छन् । सरकारले लागू गरेको लक–डाउन जनताकै सुरक्षा लागि गरिएको भन्दै पूर्ण पालना गर्न आग्रह गरे । मुख्यमन्त्रीले कोरोनाबाट क्षति कम गर्न घरमै बस्ने र प्रदेशबासीलाई अत्यावश्यक वस्तुको अभाव हुन नदिने स्पष्ट पारे । 

उनले कोरोना भाइरस विरुद्धको लडाइँमा जुट्न चिकित्सक र सुरक्षाकर्मीको मनोबल उच्च बनाउन सहयोग आवश्यक रहेको समेत स्पष्ट पारे । प्रदेशका जनताले लक–डाउनको पूर्ण पालना गरेका छन् । सामाजिक सञ्जालदेखि प्रहरीले घर बाहिर ननिस्कन आग्रह समेत गरेका छन् ।