कोरोनाभाइरस महाव्याधिका कारण अमेरिकामा बेरोजगारीको दर आर्थिक मन्दीको बेलामा भन्दा बढी हुने वार्विक विश्वविद्यालयका अर्थशास्त्री रोजर फार्मरले बताएका छन् । 

यसै हप्ताको आरम्भतिर यूएस फेडरल रिजर्भका एक अधिकारीले संक्रमणका कारण ३० प्रतिशत अमेरिकीहरू बेरोजगार हुने अनि देशको कुल गार्हस्थ्य उत्पादन ५० प्रतिशतले घट्ने पूर्वानुमान गरे । यूएस फेडरल रिजर्भ बैंकका अध्यक्ष जेम्स बल्लार्डले यसै वर्षको दोस्रो त्रैमासिकमा यस्तो स्थिति आउने बताए । 

‘पूर्वानुमान सही ठहरिएछ भने अहिलेसम्मकै सबभन्दा ठूलो आँकडा हुनेछ । ग्रेट डिप्रेसनको बेलामा अमेरिकाको बेरोजगारी दर २४ प्रतिशत थियो,’ प्राध्यापक फार्मरले बताए । 

सामाजिक एकान्तवास अन्त्य भएपछि परिस्थिति सुध्रिन थाल्ने भएकाले अहिलेको असहज अवस्था अल्पकालीन मात्र हुने उनले बताए । तर अर्थतन्त्रलाई उकास्नका लागि दिइने सही गतिशीलतमा यो कुरा भर पर्ने उनको कथन छ ।

‘स्थायी रूपमै रोजगारी गुमेमा र रोजगारदाता तथा जागिरेबीचको सम्बन्ध भत्किएमा अर्थतन्त्र उकासिन थप समय लाग्नेछ,’ उनले भने । 

यूएस प्राइभेट जब क्वालिटी इन्डेक्सले जारी गरेको भविष्यवाणीमा अमेरिकाभरि भाइरसका कारण कम्पनी बन्द भएकाले तीन करोड ७० लाख कामदारहरूको रोजगारी गुम्न सक्ने देखिएको छ । सरकारले व्यापारिक प्रतिष्ठानहरूलाई सहयोग गर्ने भने पनि बेरोजगारीको दाबी गर्नेहरूको संख्या ऐतिहासिक रूपमै बढ्ने देखिन्छ ।