इटली अहिले निकै कठिन अवस्थामा छ । लकडाउन लगाएको तीन हप्ता बितिसक्दा पनि स्थिति सामान्य हुन सकेको छैन । 

चारैतिर सन्नाटा छ । साइरनको आवाज मात्र सुनिन्छ । 

अहिलेसम्म त्यहाँ ९२ हजार ४७२ जनामा संक्रमण देखिएको छ भने १० हजार २३ जनाको मृत्यु भइसकेको छ । 

लगभग एक करोड जनसंख्या भएको उत्तरी इटलीको लोम्बार्डी क्षेत्र ध्वस्त हुने स्थितिमा छ । देशको कुल गार्हस्थ्य उत्पादनमा उक्त क्षेत्रले २० प्रतिशत योगदान गर्छ । 

त्यहाँ सबभन्दा बढी २३ हजार ८९५ संक्रमित फेला परेका छन् र ५ हजार ४०२ जनाको मृत्यु भइसकेको छ । 

इटलीले यस महाव्याधिको गम्भीरतालाई बुझ्न अनि यसविरुद्ध उपयुक्त कदम चाल्न ढिलो गर्‍यो । उत्तरी इटलीमा महामारी फैलिँदै जाँदा समेत नेताहरूले सबै कुरा नियन्त्रणमा छ भनिरहे । 

संक्रमण बढ्न थालेपछि मानिसहरूलाई एक ठाउँमा भेला हुन दिइएन । अनि मानिसहरूलाई घरैमा बस्न भनियो । तर अटेरी गर्दै मानिसहरू घुमिरहे । एक हप्तामा एक लाख मानिसले लकडाउनको अवज्ञा गरे । 

संक्रमितको संख्या ७० हजार नाघेपछि बल्ल कडीकडाउ गर्न थालियो । सेनालाई खटाइयो । अनावश्यक रूपमा घुम्नेमाथि तीन हजार युरो जरिवाना लगाइयो । 

अहिले त्यस्ता मानिसमाथि मुद्दा चलाइएको छ । उनीहरूलाई पाँच वर्षको सजाय हुन सक्छ । 

लोम्बार्डीका अस्पतालमा तिलको गेडो राख्ने ठाउँ पनि छैन । सुरक्षा उपकरणहरूको हाहाकार छ । चिकित्सक र स्वास्थ्यकर्मीहरूलाई नै भाइरसले लडाएको छ । त्यहाँ पाँच् हजारभन्दा बढी स्वास्थ्यकर्मी संक्रमित छन् । ३३ चिकित्सकले ज्यान गुमाइसकेका छन् । १९ जना त लोम्बार्डीमै मरे ।

त्यहाँका चिकित्सकहरूलाई सहायता गर्न रुस र क्युबाबाट स्वास्थ्यकर्मीका टोली आएका छन् । 

कोरोनाका कारण इटलीको अर्थतन्त्र ध्वस्त छ । सन् २००८ को आर्थिक मन्दीको भन्दा खराब स्थिति छ । सरकारले कम्पनीहरूलाई २५ अर्ब युरोको आर्थिक प्याकेज दिने घोषणा गरेको छ तर यो एकदमै सानो रकम हो । 
कम्पनीहरूले कर्मचारीलाई बिदामा पठाइरहेका छन् । फेशन, फूड, फर्निचर र फरारी बाहेक अर्थतन्त्रका सबै पक्ष सुस्त हुनेछन् । 

इटलीमा संक्रमित व्यक्तिहरूको औसत आयु ८०.४ वर्ष छ । त्यहाँको जनसंख्यामा ६५ वर्षमाथिका मानिसको संख्या २३.३ प्रतिशत छ जुन युरोपको औसत (१९ प्रतिशत) भन्दा निकै माथि हो । 

त्यहाँ ६० वर्षभन्दा मुनिका मानिसको मृत्युदर १ प्रतिशत मात्र छ । ८० वर्षभन्दा बढीका मानिसको मृत्युदर २२ प्रतिशत छ । तीमध्ये धेरैजसो मधुमेह, हृदयरोग र वार्धक्यको रोगबाट ग्रस्त थिए । 

इटलीमा शवयात्रा निकाल्न प्रतिबन्ध लगाइएको छ । कोरोनाभाइरस संक्रमित मानिसहरूलाई परिवार र साथभिाइसँग भेट्न दिइएको छैन । परिवारका मानिसलाई अस्पताल आउने अनुमति समेत छैन । 

स्वास्थ्य अधिकारीहरूका अनुसार, शवमा भाइरस संक्रमण हुँदैन तैपनि भाइरस कपडामा लामो समयसम्म बस्न सक्छ । त्यसैले शवहरूलाई तत्कालै सील गरिन्छ । 

इटलीमा मृतकलाई पूर्ण सम्मानका साथ उसको प्रिय कपडा लगाएर गाड्ने चलन छ । परिवारका मानिसले मृतकले मन पराएको कपडा लगाएर उसलाई जिाउँदै अन्तिम संस्कार गर्ने गर्छन् । 

तर अहिले मृतकलाई अस्पतालकै गाउन लगाएर चुपचाप गाड्ने गरिएको छ । मृतकलाई गाड्ने काममा सेना परिचालन गरिएको छ ।