सरकारले सबै सीमा नाका बन्द गरेको १ हप्ता पुगेको छ । कोराना भाइरसको रोकथामको लागि भन्दै सीमा नाका बन्द गरिएको भनिएको थियो तर लुकेर आउने र प्रशासनले सुविधासहित भित्र्याउने क्रम निर्वाध रुपमा चल्दै आएको छ । 

सरकारले गत चैत ११ गते भारतबाट फर्केर गौरीफन्टा नाकामा रोकिएका १ हजार नेपालीलाई अन्तिम पटकको लागि भन्दै प्रवेश दिएको थियो तर सुदूरपश्चिम प्रदेशस्थित विभिन्न सीमा नाका हुँदै भित्रिने क्रम दिनहुँ जारी रहेको छ ।

कैलालीको गौरीफन्टा, कञ्चनपुरको गड्डाचौकी, दार्चुलाको पुलघाटलगायत सीमा नाका भएर आउने र जानेक्रम जारी रहेको पाइएको छ ।

सीमा नाका बन्द भएपनि भारतमा रहेका ६८ जना नेपाली जंगलको बाटो हुँदै लुकेरै नेपाल प्रवेश गरे । भारतको पलियाबाट पैदल हिँडेर धनगढी पुगेका उनीहरूलाई प्रहरीले मोहना नदीको घाटबाट नियन्त्रणमा लिएको थियो । पछि प्रशासनले गाडीको व्यवस्था गर्दै उनीहरूकै थातथलो पुर्‍यायो ।

धनगढी उपमहानगरपालिकाका मेयर नृपबहादुर वडले नियन्त्रणपछि धनगढीका १२ जनालाई क्वारेन्टाइनमा राखिएको र बाँकीलाई सम्बन्धित स्थानीय तह तथा सम्बन्धित जिल्लामा पठाएको जानकारी गराए । गौरीफन्टा नाका भएर बाँके जिल्लाका १५, डोटीका ४, बाजुराका १३, बैतडीका १, अछामका १ र डडेल्धुराका १ जनालाई सम्बन्धित जिल्लाको क्वारेन्टाइनमा राख्ने गरी पठाइयो ।

कञ्चनपुरको गड्डाचौकी नाकाबाट पनि दिनहुँ आउने जाने क्रम जारी छ । प्रशासनको संलग्नतामा दिनहुँ सहज प्रवेश दिँदै आएको पाइएको छ ।

आइतवार मात्रै गड्डाचौकी नाका भएर करीब २०० जना भारतीय नागरिक बाहिरिएका छन् भने भने करीब ३०० बढी नेपाली भित्रिएका छन् ।

कञ्चनपुरका प्रमुख जिल्ला अधिकारी नुरहरि खतिवडाले सीमा बन्द र ‘लक–डाउन’ उल्लंघन भन्दा पनि सीमामा अलपत्र परेकाहरूको समस्यालाई मध्यनजर गरी व्यवस्थापन गर्दै आएको बताए । ‘विभिन्न ठाउँबाट आफ्नो घर जानलाई सीमा आएका हुन्छन् । उनीहरूको पनि बाध्यतालाई ध्यान दिनैपर्छ तर उनीहरूको घर रहेको सम्बन्धित स्थानीय तहले उनीहरूलाई क्वारेन्टाइन राखेर जाँच चाहिँ गरिनुपर्छ । सीमामा रोकेर समस्या समाधान हुने होइन,’ उनले भने ।

भारतको धार्चुलाबाट दार्चुला प्रवेश गर्ने क्रम पनि दिनहुँ हुँदै आएको छ । १ हप्ताको अवधिमा प्रशासन र जनप्रतिनिधिको सक्रियतामा पटक–पटक प्रवेश दिइएको छ । जुनक्रम जारी रहेको पाइएको छ ।

धार्चुलामा अझै पनि करीब साढे ३०० बढी नेपाली शुक्रवारदेखि नेपाल प्रवेशको आशामा बसेका छन् । दार्चुलाका प्रमुख जिल्ला अधिकारी यदुुनाथ पौडेलले दार्चुला र धार्चुला जोड्ने पुलघाट बन्द रहेको बताउँदै रोकिएका नेपालीलाई प्रवेश गराउन गृह मन्त्रालयसँग पहल जारी रहेको जानकारी दिए । आइतवार साँझसम्म उनीहरूलाई प्रवेश गराउने प्रशासनको तयारी थियो तर गृह मन्त्रालयबाट आदेश नआउँदा उनीहरूको लागि खानाको व्यवस्था पारी नै गरिएको थियो ।

भारतको पिथौरागढका विभिन्न क्षेत्रमा काम गरेर फर्किएका उनीहरू धार्चुलामा अलपत्र परेका छन् । अलपत्र परेका नेपालीलाई सम्बन्धित स्थानीय तहले क्वारेन्टाइनमा राख्ने गरी व्यवस्था मिलाउने, गाडीको व्यवस्था गर्ने गरी प्रवेशको पहल जारी रहेको बताइएको छ । सीमामा रहेका नेपालीले आइतवार सरकारविरुद्ध नाराबाजी समेत गरेका थिए ।

भारतबाट आउने क्रम जारी भएपछि कोरोना संक्रमणको उच्च जोखिम बढेको छ । सीमा नाका बन्द गरिएको भनिएपनि लुकीछिपी स्वदेश फिर्ता हुने र प्रशासनले सुविधासहित भित्र्याउने क्रम जारी रहेको छ ।

भारतबाट फर्किनेहरू क्वारेन्टाइनमा नबस्ने, अटेर गर्ने समस्या भएपछि झनै संक्रमणको उच्च जोखिम बढेको हो । सरकारले कम्तीमा १४ दिन क्वारेन्टाइनमा बस्नुपर्ने निर्देशन जारी गरेको छ तर निर्देशनको अवज्ञा हुँदै आएको छ ।