कोभिड १९ बाट संक्रमित ९० वर्षकी एक महिलाले आफूलाई भेन्टिलेसनमा नराख्न डाक्टरहरूसँग आग्रह गरेपछि उनको मृत्यु भएको छ ।

बेल्जियमकी सुजेन होलारेटस नामकी ती वृद्धाले आफू आफ्नो जिन्दगी खुसीसाथ बाँचिसकेको भन्दै उनका लागि राखिएको भेन्टिलेसन कुनै युवा अवस्थाको बिरामीलाई राखिदिन आग्रह गरेकी थिइन् ।

उनी गत मार्च २० मा अस्पतालमा भर्ना भएकी थिइन् । स्वासप्रस्वासमा अप्ठेरो देखिएपछि भर्ना भएकी उनलाई परीक्षणमा कोभिड १९ देखिएको थियो ।

संसारभरि भेन्टिलेसनको अभाव भइरहेको तथ्य बाहिर आएपछि बेल्जियममा यस्तो घटना भएको हो । भेन्टिलेसन सास फेर्न नसक्ने बिरामीहरूका लागि कृत्रिम फोक्सो जस्तै हो । उनले भेन्टिलेसनमा बस्न अस्वीकार गरेपछि केही घन्टामै उनको मृत्यु भएको बताइएको छ ।

उनले डाक्टरहरूसँग भनेको भनाईलाई उधृत गर्दै डेलीमेल लेख्छ, ‘म कृत्रिम स्वासप्रस्वास लिन चाहन्न । मैले मेरो जिन्दगी सुखपूर्वक बाँचिसकेकी छु । यो भेन्टिलेसन युवा बिरामीका लागि राख्नुहोस् ।’