इटलीको मेस्सिनामा एकजना पुरुष नर्सले आफ्नी डाक्टर प्रेमिकाको घाँटी थिचेर हत्या गरेका छन् । प्रेमिकाले आफूलाई कोरोनाभाइरस सारेकाले हत्या गरेको भनी उनले प्रहरीसमक्ष बयान दिएका छन् । 

चिकित्सक लोरेना क्वारान्तालाई उनका प्रेमी एन्टोनियो दे पेसले हत्या गरेका हुन् । हत्या गरेपछि दे पेस आफैंले प्रहरीलाई खबर गरेका थिए । 

लोरेना मेस्सिना विश्वविद्यालयमा चिकित्साशास्त्र पढिरहेकी थिइन् र त्यहीँ नै इन्टर्न पनि थिइन् । प्रेमी दे पेस पनि त्यहीँ कार्यरत थिए । उनलाई मृत्युपश्चात् मेडिकल डिग्री दिइने विश्वविद्यालयले जनाएको छ । 

घटना मंगलवार भएको हो । दे पेसले एकाबिहानै प्रहरीलाई फोन गरेर प्रेमिकालाई मारेको खबर दिए । 

दे पेस आफैंले आफ्नो नाडी काटेका थिए । प्रहरीले उनलाई अपार्टमेन्टको कोठामा फेला पारेपछि तत्कालै स्वास्थ्यकर्मीहरूलाई बोलाएको थियो । 

उनलाई लोरेनाकै सहकर्मीहरूले अस्पतालमा उपचार गरेका थिए । 

तर लोरेनालाई भने जोगाउन सकिएन र अब दे पेसविरद्ध हत्याको आरोप लगाएर मुद्दा चलाइनेछ । 

अधिकारीहरूले दे पेसको बयानमा शंका गरेका छन् । लोेरेना र दे पेस दुवैको परीक्षण गर्दा कोरोना संक्रमण भेटिएको छैन । 

हत्याको खबर सार्वजनिक भएपछि दे पेसविरुद्ध सामाजिक सञ्जालमा भयंकर आक्रोश छ ।